第二場、第四班、一二○○米。方嘉柏馬房的「雙節棍」，來港五歲才首次出賽，原來馬主其實一早經已購入，諗住上年七月前以三歲新馬身份來港，去到八月轉四歲，就冇違反本地入口規例，點知上飛機之前，在當地馬匹檢疫站發現病毒，雖然「雙節棍」本身冇事，但就全部要滯留多半年觀察，確定馬匹再無問題先准上機，就係咁要等到今年二月中先到港，嚟到香港操練一輪之後，前腳又開始頂唔順，咁獸醫建議休息一段長時間，於是到上周三才出，點知賽事又再取消，陰差陽錯之下直到今時今日至出，馬主單就養馬費使多幾十萬，如今為追數必拚無疑。
第三場、第四班、一二○○米。「君達星」原是蘇偉賢旗下，但礙於腳傷困擾，上季轉投丁冠豪馬房。打開其傷患紀錄的確唔多理想，試過右前腿多次不良於行、左後腿又傷過，十月初曾發燒阻滯多多。「君達星」之前九月從化試閘大勝，子彈快馬兼同組對手太弱，有此表現是意料之內。發燒後休息五天重投操練，十一月初由潘頓試泥閘掄元，該課起步應聲撲出直領到底。「君達星」全兄弟「喜進」乃窄場能手，現重返四班反客為主，有權橫掃。