■王梓軒(右)成功邀請恩師趙增熹(左)破天荒亮相。香港文匯報訊 王梓軒十周年演唱會《CROSSING 源·樂 》將於下月20及21日假灣仔會展舉行。入行十年，梓軒想藉演唱會主題曲 《多得你》答謝一路以來與他同行的前輩及戰友，所以他邀請了C君填詞，歌詞中充滿感恩之心：「前行一雙腳踏過，同行多得你伴我」。《多得你》MV更成功邀請恩師趙增熹破天荒亮相，梓軒話：「好多謝師傅阿熹粉墨登場！」
早前，梓軒約埋師父趙增熹，個唱班底的Cousin Fung、結他手Bonny、鼓手Joey及打碟的Sean一齊拍MV。MV中，阿熹去到一個地下音樂室，見到梓軒表演，被他的演唱吸引着，阿熹將一個寫上「台上一分鐘，台下十年功」的杯墊交給梓軒，梓軒珍而重之收起，雖然鏡頭簡單，但阿熹好謙咁話：「都好難㗎！我都NG咗好多次，哈哈！」
梓軒話：「好多謝阿熹幫忙，呢個MV好開心可以請到合作咗好耐嘅朋友同我去拍，個故事講兄弟一齊努力，Cousin Fung同我一齊寫呢首歌，其實我十周年（個唱）嘅班底都係逐個去揀，每一位都係我嘅音樂路上共事或者好重要嘅崗位，同佢哋拍MV，係想表達我哋由細玩到大，由細band房玩到大舞台咁！」