今個馬季喺社會一片紛亂嘅氣氛下開鑼，賽事安排無可避免受到影響，最轟動當然係為咗「天祿」取消夜馬及十一月十三日為確保員工和馬迷安全再次取消夜馬，至今仍未落實幾時補賽。馬會亦作出連串應變，已將早前嘅快活谷日馬改跑沙田，而日馬開跑時間一律提早到中午十二點三，夜馬又不時加場跑九場，日夜馬編排都好大轉變。馬會日夜馬開賽時間作出改動都係就返社會實際狀況，港鐵不時封站而路面交通亦隨時有變，直接影響馬迷同馬會員工離開馬場。馬會呢次喺被動情況下提早日馬開跑時間，可以話有意外驚喜，馬迷普遍歡迎同接受呢個新安排。日馬提早開跑試咗幾次後，唔少馬迷都話贊成早啲跑早啲完，家陣食晏時間開跑，大約五點就跑完尾場，天未黑可以輕輕鬆鬆趕下場，同家人或朋友食餐晚飯。雖然提早開跑嘅安排暫時只會維持到年尾，睇怕屆時市面都未回復平靜，馬會好大機會要延續日馬提早開跑呢個安排。至於夜馬跑九場，唔知馬會係咪打定底，就算萬一補唔到賽，起碼場次嗰度都補返條數，亦有可能係乘機試一下水溫，準備長遠推行夜馬九場。有別於日馬，夜馬頭場開跑六點九，好多馬迷可能都未收工，但係今時今日投注方便，一部手機就攪掂。同馬迷唔同，評馬人就無得揀，只可以按馬會安排分配工作，加場工作量大咗就唯有執生，無謂搵藉口話唔夠時間刨馬影響專業啦。