本周進入一年一度馬壇盛事，由國際騎師錦標賽展開序幕，今晚九場賽事以B欄C彎作賽，頭場提前至下午六時三十分開跑，四場國際騎師賽均可觀性甚強。練馬師方面，方嘉柏及告東尼均派出不少實力馬參戰，可優先留意。騎師方面，雷神、田泰安及莫雅都手執多匹惡馬，值得吼實。
第一場、第五班、一二○○米。「安定繁盛」上季曾在四班泥地千二入圍，所以今季落到五班搵食，贏馬乃遲早問題，在此一定夠殺，事關四班及五班的差距實在太大，更何況「安定繁盛」本身型格不俗，今季拚過兩仗後狀態提升不少，現渡江爭千二，馬膽不作他想。
第二場、第五班、一六五○米。「話晒事」今季前後跑過四次，前仗初跑五班即喺此程入Q，賽後被安排上從化受訓，兩周後告仔再報同程，由潘頓接手也發揮水準跑入第四；呢匹唔夠一千磅細粒仔復課所見收身結實，神情活躍火氣旺，觀感猶勝上回；今晚繼續瞄準同程，誓必作出交代。
第三場、第四班、一二○○米。「馬功臣」前仗出戰田草千二，擺前走的兩匹馬包辦連贏，本身則獲殿軍水準不差；上次渡江爭千二，末段後上如飛只負於「索先生」馬頸位，而跑第三「孖寶」喺上周三已贏馬補中，足證現評四十六分的「馬功臣」今賽只列陣普通四班賽，應可勝回一仗。
第四場、第四班、一○○○米。「萬眾之力」今季被評五十分編入四班，上仗轉戰谷草一千米，臨場乃十八倍冷門，七檔起步沿途跟前守在二疊，轉入直路踩油即掟甩對手輕鬆取勝；官仔馬仍留四班作賽必有優勢，如下決心再搏有力添食。
第五場、第四班、一六五○米。「一舖成名」前仗賽事就喺谷草一哩六倍贏馬，翌仗依然抽到靚檔，史卓豐沿用前仗一貫均速戰略，轉入直路打衝鋒猶有餘勁，最後兩駒壓線有幸運之神眷顧再下一城；拚後只加五分仍留在四班搵食，只要交回近仗贏馬水準，當有力衝擊三連冠。
第六場、第四班、一六五○米。「水箭龜」今季跑過五次，跑至第三仗出爭田草千八米初次上名；打後兩戰田草千六，上回搵到潘頓執韁，大熱門全程守好位，入直路踩油透出打開勝門；拚後加六分仍留在四班打滾，今次渡江轉爭一哩，添食應冇難度。
第七場、第三班、一六五○米。「太陽威威」上季在港初出已取得兩勝三位佳績，在三班田草千四更曾擊敗「紀利雄星」及「超新星」等實力指標，長遠來看應是一匹坐穩二班之馬，不過今季開季未算順利，初出一役於田草千二全程走三疊，直路更飛出跑道中央，結果只能勉強追近；翌仗增程至千四，前半段又與其他快馬互燒，最終當然無以為繼；今次刻意轉場兼增程，單看整個部署已值得一試。
第八場、第二班、一八○○米。「轉數高」賀廄當紮中距離佳駟，季內三戰除了初出千二作開氣外，翌仗回配潘頓重返谷草一哩，竟以摧枯拉朽的姿態獲勝，走勢令人咋舌；上仗再來成為十七蚊大熱門，轉入直路兜出外疊一攻而破；今次殺上二班改孭輕磅，交出水準可坐位望贏。
第九場、第三班、一二○○米。「舞士精神」今季初出跑田草直路賽力戰得亞；加三分後要上三班作賽，首次渡江出爭千二，增程、初跑谷草及排外檔難度不低，怎料沿途走三疊望空，直路再跑不利場地之下，最終僅敗於賺盡形勢及場地之「明駿之星」；上仗喺相同際遇下，馬主冇入場卻影贏對手；以今仗快馬不多，仍可憑天生速度切入，值得信賴。