今晚谷草安排九場賽事，以最窄嘅C加三欄C加六彎作賽，頭場下午六時四十五分開跑，全晚並無設盃賽場合。練馬師方面，姚本輝、呂健威、方嘉柏及丁冠豪皆派出多匹實力馬參戰，可以優先留意。騎師方面，雷神、潘頓及田泰安都手執多隻惡馬，可作為扶手棍看待。
第一場、第五班、一六五○米。「葵涌老友」（圖5號）乃五班老手，近兩季都能交出頭馬，不約而同都係由潘頓策騎；上場潘頓再出擊，結果即以十二倍冷門追回一席第三；官仔馬拚後翌日已見機坪復操，今次換上鬥志一流，騎後追馬有一手的巴度操刀威力不減，隨時可將對手一網成擒。
第二場、第四班、一○○○米。「開心好友」踏入今季先後三戰，第二仗渡江轉爭一千米，排十一檔以五十九倍大冷門跑入第三；上仗騎師錦標賽場合抽到日本騎師，末段望空衝刺強勁跑回一席第二；今次續攻同程，配合馬房重兵可予優先捧場。
第三場、第四班、一六五○米。「夢幻戰士」告東尼四歲C布馬，今季踏入大熟期，經一役熱身開氣之後，翌仗即在四班窄場千八米輕鬆開糊；再出經兩戰稍休回氣之後，剛役一哩再展開攻勢又執一W；今賽對手未見增強，添食機會高唱。
第四場、第三班、一二○○米。「極速王」上季插班初出谷草千二，排在最不利的十二檔，早段留至包尾並穩守有遮擋的外疊，入直路繞出大外疊以勁勢衝刺，造全場最快末段時間追入第四，負於走位暢順的頭馬「載譽歸來」半個馬位，表現驚人；季內三戰，翌仗喺谷草千二米以四倍開糊；上仗再戰也力拚僅負得亞；此駒特別有利久休復出，今賽前唞了個多月，再捷絕不為奇。
第五場、第三班、一二○○米。「好好學習」前仗初出即在田草直路賽入位，回看該役頭馬「亮先生」其後喺二班再贏，而在「好好學習」身後過終點的「英之星」及「極速前進」再出也報捷；上賽渡江轉爭千二，結果力戰只跑第二；今次練者仍報千二米上陣，只要搶得出便有望帶到開齋。
第六場、第四班、一二○○米。「全心全意」季內三爭同程，初出即以十一倍冷門身份跑得亞軍；翌仗再戰姚本輝已叫定馬主入場，希望可補中拉頭馬，可惜抽排外檔起步，最終力拚下只跑第四；上仗小休三周後再臨，配巴度排位好卻發揮一般只跑第九，而今捲土重來，環看對手實力非強，當有機會打開勝門。
第七場、第三班、一六五○米。「健康在望」前次轉戰田草千四，最後僅負頭馬個多身位，已證明本身在三班有一爭之力；上次再報此程，找到騎功硬淨蘇兆輝掛帥，廿七蚊留前鬥後一攻而破；今次轉爭谷草一哩，計血統上應合腳法，有力再添勝仗。
第八場、第三班、一二○○米。「傳奇」七歲南半球馬近呢幾季都係三四班升降機，今個暑假一早復課，可是連拚多仗皆中伏；直到上仗交予雷神接手，爭谷中千二以兩倍大熱勝回一仗；今次升班再戰此程，對手強卻換回可觀賠率，值得一搏。
第九場、第二班、一二○○米。「帆哥兒」今季初在二班起步轉到泥地發展，初出一場對手大部分都是二班泥地中堅，最後階段直路衝刺跑入第四名絕不失禮；其後降落三班即在同程贏馬，雖然贏來有些少運氣，主要對手「錶之銳」在直路上受到阻礙，但是本身終於打破二奶命，在泥地殺出一條新出路；今次小方入紙渡江轉爭千二，翻看上季初在此程與「紅星」串Q，可見如配合形勢守好位，有望打入三甲之列。