第三場、第四班、一六五○米。馬主三十對團體以往養過「一帆風順」，曾由蘇保羅訓練贏過兩場頭馬，呢個團體嘅成員任瑞生名下馬「一見傾心」目前亦養喺蘇插A早前落四班一箸夾中順利贏馬，不過三十對團體嘅上季新馬「一路順風」，就轉交俾苗禮德訓練，苗禮德為了報答幕後支持，當然要盡快交代。「一路順風」今季四戰兩度得季軍，四歲馬暑後適應環境進度唔錯，十月初在田草千二米跑第三，之後轉來谷草千二米又跑第三，證明場地性能冇問題，但上場再跑同程表現不進反退，賽後騎師更要向馬會競賽小組解畫；復課立即拍跳三段練氣，今次越程出戰一哩，部署明刀明槍有力收復失地。
第六場、第四班、一二○○米。「全心全意」母系與昔日六捷的「國寶」為半兄妹窄場性能有保證。「全心全意」上季四戰均大敗，踏入今季初出跑谷草千二米，臨場竟然只得十一倍，結果直路一再受阻下依然殺入第二，表現大躍進；翌仗雖然排了個十一檔，早段跟得較前，難免就影響了後勁得第四；上場似怯於大熱「傳奇」，跑來留有以待；今次捲土重來加上姚廄氣勢如虹，必欲替此駒打破缺口，值得投以信心一票。