練馬師姚本輝今季氣勢強勁，目前排在練馬師龍虎榜首位，假如保持氣勢的話，估計季尾仍有力保持在三甲之位，何況姚本輝尚餘三個馬季便屆滿退休年齡六十五歲，若然今季及打後兩季在練馬師榜頭馬或獎金（任何一項）躋身前五名，可向馬會申請延長牌照至少三年，因此必定搏盡無悔。
練馬師姚本輝秀髮濃密，外表有型有款，完全看不出經已六十二歲。查實他是馬會第一期見習騎師，與告東尼及羅國洲等人同屆，一九七四年獲發騎師牌照，九五至九六年馬季開始從練，不經不覺在馬圈打滾近半個世紀。馬會規定練馬師於該馬季年滿六十五歲須退休，除非之前連續三個馬季，在練馬師榜的頭馬或獎金排名躋身前五名。姚本輝將於二○二一至二○二二年馬季便六十五歲，所以今個馬季開始符合上述規定，才有望在三季之後獲得續牌，勢必更加賣力。翻查近年練馬師榜，要躋身前五名，頭馬數字要達五十場左右，雖然姚本輝近幾個馬季均排在前五名之外，但今季進佔從化馬房後，兵力大增，養馬量達七十匹爆倉水平，而開季至今賽事，經已累積廿多場頭馬，要在餘下賽日多取近四十場頭馬，並非沒有可能，甚至牌面上真係有機會衝擊今季冠軍寶座。
揸住季初姚廄標青成績嚟睇，真係好正好爽，但跑完國際賽正式踏入季中階段，先至見真章之時，已經連續四年稱王嘅蔡約翰馬房，雖然依家得十多場頭馬，不過佢批子彈如果好似以往般季中發力，真係幾個箭步已可以反先，所以輝哥想爭冠，第一樣一定要睇蔡約翰頭，假若神仙批質新馬對辦，講真已經輸咗九成，唔關輝哥練馬功力事，因為就算大摩、告東尼、羅富全及方嘉柏都唔會頂得住。好喇，就算蔡神仙今季無近季咁霸氣，但輝哥都未可以安枕，大家睇番姚廄家陣頭馬得以領先，其實都係靠一眾中年或舊馬充撐場面，好似「正陽清風」（圖12號）取得三捷、轉倉馬「隨我來」兩W、另外五歲「綠尚飛馳」及七歲「威震天」兩勝，至於「新界之星」、「王者再現」及「鞍歌」等等都已經幫手搶到頭馬，再嚟第二浪攻勢，真係要靠質新梯隊了，姚廄有從化倉，養馬量七十駒以上，當中五十二分馬就有十九隻之多，但呢批馬好多都仲未試閘，質素又唔似蔡神仙嗰手咁有保證，究竟谷唔谷得起真係好關鍵，當然凡事要向好方面諗，成手質新馬進度扶到入正軌，當然有得爭冠喇，但未知之數始終得個估字，要贏冠軍唔好話早幾季阿蔡贏逾九十場超晒班咁，但至少都要七十場左右，即係姚本輝馬房去到季尾，攻勢要一浪接一浪先夠衝擊冠軍寶座，輝哥新兵有冇咁嘅能耐，真係要睇過先知。