【資料速遞】蒜頭爺爺速速到位

2019-12-20

去到呢一刻為止，好多華倉成功把握住時機，趁嗰幾個大馬房未發力，頻頻搏殺得手三扒兩撥盡量交代咗先，以免夜長夢多！老實講，部署絕對正確，單係蔡約翰啲PPG一旦嚟料，同佢鬥「片」根本浪費彈藥，家陣進佔前列嘅幾個華倉，最旺係姚本輝，跟住就到呂健威，手風越搏越順，反而向來攻勢平穩嘅何良、葉楚航忽然慢晒軚？尤其係葉楚航啲馬，因為跑得密啲分自然減得快，廐內大部分馬評分跌至新低，冇理由得個睇字，估計葉楚航會陸續安排搏殺，隨時好似上季隻老馬「大運舞台」咁，贏到你唔信。今次葉廐手馬中，「蒜頭爺爺」絕對有得諗，目前四十六分比上勝低五分，隨時一聲令下速速到位。