第一場、第五班、一二○○米。前練馬師梁定華退休後閒時上網開咪講馬，不過正職係做馬販，雖然佢買啲馬唔係咩高班材料，但勝在實用，好似早前佢買入嘅「隨我來」開齋之後又再贏馬捧盃，又有「發財先生」泥地爆冷得手，佢買入嘅馬共通點都係減夠分先至會郁手。今次「餘皇」上仗贏馬開齋，今次有力作乘勝追擊。「餘皇」五歲英國自購馬，來港初評七十一分，今季落到五班自然呼風喚雨，前仗在泥戰試準後，上場轉來谷草立即贏馬，目前仍可留在五班角逐，話唔定「餘皇」又幫梁定華威番次。
第九場、第三班、一二○○米。「一拍即合」跨季三出三捷，路程俱為谷草一千米，今次卻轉爭千二米，略有疑問。其實，此駒母線方面具長力支持，惟本身曾患喘鳴症，初期跑短多少無可厚非，如今五歲更趨成熟，健康亦一切正常，自然有增程必要。再看上場末段鞍上人潘頓騎來手忙腳亂，直到最後一百米才能落鞭，認真施壓即力拒「金匯昇」來犯，只衝幾步便奠定勝局，雖然剛勝贏馬姿態超級，但由於取勝距離較短，賽後只被加七分，對質新當起分子而言阻力有限，埋門狀態方面持續見好，對手不算太強，可保不敗身。