香港文匯報訊 關心妍（Jade）今年啟動入行18年首次《時刻觸動世界巡迴演唱會》，繼廣州站後，Jade日前在東莞舉行第二站演出，全場爆滿，不少香港歌迷更組團支持偶像，踏上台未開口，歌迷的尖叫聲已令Jade差點感動落淚。
首次在東莞開騷的Jade，特別把歌單改動，唱出歌迷在網上投選的歌曲，歌迷反應熱烈。Jade一氣呵成唱出多首經典金曲《負擔不起》、《假使我漂亮》、《終點》、《你有心》、《我太強》、《手下敗將》、《放生》等。
巡唱第二站，Jade請來好友羅力威擔任嘉賓，平時怕怕醜醜的羅力威，自爆Jade是他心中的女神，初入行在頒獎禮第一次見面，想了好耐先敢上前合照，羅力威說：「Jade太多歌打動我，亦影響咗我創作音樂靈感，初入行每次見到佢都心跳加速。」令在旁的Jade哈哈大笑，Jade說：「我嗰陣都結咗婚㗎喇，我同佢老婆（雨僑）好熟㗎！」Jade大讚羅力威彈得一手好琴，更即場鋼琴伴奏為Jade度身訂造的新歌《時刻》，然後兩人再合唱網絡神曲《可不可以》。
靠老公照顧囡囡
在個唱尾聲，Jade有感而發，原來她在開騷前兩星期失聲，經醫生診斷後發現她的聲帶出血，立刻要求Jade停止練歌，連做運動都唔可以，只可以閉關休息養聲，以免情況變壞，Jade說：「臨開騷前兩星期突然聲沙，馬上去睇醫生照聲帶，醫生話左邊的聲帶出血，好擔心，因為我真係好珍惜每一場演出及歌迷，你哋買飛等咗我咁多年，所以今日真係一個奇跡，可以喺咁短時間內好返！今晚唱最後一首歌先敢同大家講，如果聲帶惡化可能要臨時取消，好感恩，多謝大家嘅支持，畀我嘅動力，令我把聲今日無事！」說罷，Jade唱出《關心...心妍》，再次感動爆喊。
Jade特別感謝老公，她說：「最慘冇得黐住個囡，連同佢玩和說話都唔得，最怕傳染佢，呢幾個星期老公好辛苦，每日帶心心（女兒）出街玩。」