第五場、第三班、一六五○米。羅廄「西利哥」馬主係鞋王李子彬新抱李皓玲，佢昔日養嘅「可人兒」同「兵威振」在港都有一出即勝紀錄，馬主算係十分急進，「西利哥」係佢今季最新寵兒，呢匹四歲英國自購馬外地三戰兩冠一亞，當中在千六及千八米賽事俱大勝對手七個馬位，相信未來性能肯定越長越妙，今次在港初出向一哩問津絕對啱數，評七十四分有力一擊即中。
第八場、第三場、一○○○米。「事事亨通」跑咗十六場先運港，不過在高伯新嚟講，最緊要有大馬主潘蘇通支持，記得一六年結束之際，高伯新被潘蘇通炒魷，四駒一炮過拉晒去告東尼，嗰年同主「大運財」更不幸戰死法國。潘蘇通上季有「大雄圖」及「大金庫」重新合作，如今高伯新獲得力撐，相信已熟到透嘅「事事亨通」，好快會打開在港勝門。
第九場、第三班、一二○○米。「鑽飛龍」在澳洲由李善訓練，出賽兩次千二米獲得全勝紀錄，周歲價四十二萬澳元，牠在澳洲贏馬以跟守中間及後追跑法為主。「鑽飛龍」父系為冠軍種馬「利得精選」，母系與澳洲打吡冠軍「遊戲世界」及MON BEAU CHEVAL同一娘始，後駒產下「愛美麗」及早前在港一出即勝的「運財高明」；「鑽飛龍」澳洲贏馬賽事水準不弱，來港後試過四課大閘走勢日益上力，初出難以輕視。