■泛暴派議員自問自答引市民噓聲，陳琬琛竟然將成排市民趕出會議室。 香港文匯報記者 攝好大嘅官威啊！泛暴派成日聲稱要有監察、要有知情權，但就隨意剝奪市民相關權利。噚日，荃灣區議會嘅泛暴派議員自問自答引起旁聽市民的噓聲，區議會主席、公民黨嘅陳琬琛直認自己睇唔到邊個噓人，但竟然將成排市民趕出會議室，真係惡到不可思議。唔少網民都揶揄佢真係「好民主」，仲話區議會以後不如叫「地區劇院」，反正都係畀泛暴議員做大戲咋嘛。不過，有激進嘅泛暴派就嫌陳琬琛廢，話佢控制唔到場面，仲俾一哥鄧炳強玩返轉頭，叫佢辭職吧啦。兩邊都唔鍾意佢，唔知佢又會唔會聽市民訴求呢？
謝旻澤自問自答引噓聲
喺噚日開會期間，泛暴派區議員謝旻澤問一哥認唔認同「會唔會有人喬裝警察去踩示威者」，鄧炳強話唔知佢講乜，佢於是話︰「我幫你答埋啦，呢個係無可能發生嘅事。」自問自答嘅偽提問引起旁觀市民不滿，大家紛紛發出噓聲。
陳琬琛一拍腦袋就要第二排全排市民離開會議室，但有啲市民話自己一直睇緊電話，根本都冇出過聲，「係咩主席啊？主席公報私仇。」
工聯會區議員葛兆源叫陳琬琛可以睇返片去公正裁決，但陳琬琛拒絕睇片搵真相，繼續喺「我睇唔到」嘅情況下一刀切要市民離開。最終，二排市民喺不忿中俾保安請離場。
咁樣嘅主持方式，好多網民都狠批佢離譜。「Kak Tin Jai」揶揄︰「『好民主』呀。知情權去咗邊呀？」「Vince Lee」話︰「他們的所謂『民主』就係咁！司空見慣！」
「Leong Kam Chan」質疑泛暴派係費事俾人知道佢哋能力不濟︰「驚比（俾）市民睇到佢的醜態。」「Edwin Chan」寸爆表示︰「區議會都係改名啦，以後叫做地區劇院啦，留番（返）比（畀）班政棍傻子自己圍爐取暖啦，可（何）必去睇佢地（哋）做大戲！依（口依）家所謂既（嘅）區議會已經唔會再理地區事務！」 ■香港文匯報記者 郭家好、甘瑜