第五場、第四班、一二○○米。大馬主劉業強屬鄉議局主席，他親自引入嘅「龍鼓飛揚」，今季有贏有位，早前曾跑三級賽百週年紀念瓶得亞軍。今期劉業強有份嘅高超聯團體馬「特駒聯盟」就跑谷草短途，近期試準而來已屆出頭之時。睇番「特駒聯盟」兩戰谷草千二米都順利跑入Q位，證明路有專長，之後上從化訓練兼試閘，埋門返港操足谷行狀態先再跑，加上本身跑法主動經常佔得先機，今仗大有機會坐正贏番場。
第八場、第三班、一二○○米。呂廄「非凡品味」上季出道，初期主力在沙田出賽但表現平平，但季尾轉戰谷草後，加上逐漸適應水土，成績火速冒升，並在谷草短途展現威力，本身具有前速又有後勁，跑法十分煞食，先後於四班同程取得兩冠一亞，可惜季尾因腳傷提早唞暑，今季更延至一月方上陣，前仗傷癒季內復出升班跑同程排外檔，段段快跟仍有前有後取得亞軍，最後僅被「飛霸龍」後上趕過得第二；經重新開氣之後加上健康好轉，上仗再出輕鬆順利補中，忠心本色可謂表露無遺，既然健康疑慮一掃而空，加上呂健威為爭取成績當然不會手軟，尚未摸底的「非凡品味」可望延續升浪。