受到新冠肺炎疫情影響，馬會於上月初宣布全港101間場外投注處即時停止服務。不過，經過約一個月時間，馬會已在剛周一起，安排指定17間投注站於每逢周一及周四開放，提供有限度服務，包括兌換現金券或中獎彩票等。畢竟投注站冇開一個月，終於喺剛周一朝早九點半重開，作為其中一間指定開嘅投注站，沙田好運中心馬會投注站未夠九點鐘已經有逾百人於站外排隊，排頭位的男士早喺七點已經排隊。據在場馬迷透露，佢哋唔少人都係返工前趕嚟入錢，亦有馬迷表示自己最近並無投注，因為冇得入錢兼冇得去投注站，覺得非常唔方便，佢亦唔想刻意登記轉數快等服務，因為覺得收現金才過癮。不過，亦有路過的馬迷話等侯進入投注站啲人輸唔切，場面十分有趣。當中排隊的市民都表示想恢復六合彩攪珠，又唔多牽涉人手咁話，發吓橫財夢都好，唔知馬會幾時會順應吓民意呢？除沙田好運中心馬會投注站，該朝旺角彌敦中心投注站及天水圍投注站同樣出現人龍，看來馬迷真的非常熱切投注站重開。不過都再提大家一次，十七間的場外投注處將會逢星期一及星期四上午九時三十分至下午六時正開放。
海外賽事消息，上周六在沙特阿拉伯首都利雅德創行、總獎金高達二千萬美元的泥地米沙特盃，為現今全球最高獎金單一賽事，結果由美國馬Maximum Security勇奪殊榮，拎走一千萬美元獎金！此駒由薛緯誠訓練、賽前古摩亞集團購入了一半股份，結果趕得切在豐厚獎金中分一杯羹，Maximum Security在最後百多米由外欄走入中路透出，再頂住內欄上前的另一匹美國馬Midnight Bisou，成功捧走首屆沙特盃。獎金高嘅賽事自然都吸引人參與，好似上周六深夜舉行嘅首屆沙特盃，總獎金達二千萬美金，雲集世界各地好手同佳駟競逐。至於今年總獎金提升至一千五百萬澳元嘅珠穆朗瑪峰錦標，已經舉辦咗三屆，亦成為全球其中一項焦點賽事。作為其中一位有幸參與珠穆朗瑪峰錦標嘅香港馬主，「川河」系馬主何家駒去年派出旗下愛駒「川河達駒」上陣，結果取得第六名，可惜佢喺今年一月中發炮，話即使佢願意俾二百二十萬澳元，依然不能買到珠穆朗瑪峰錦標未來三年嘅參賽席位。不過，世上無難事，只怕有心人，根據澳洲方面嘅消息，何生終於可以買到位，能夠參與未來三年嘅珠穆朗瑪峰錦標，同時亦代表主辦單位對何生充滿信心，相信佢會積極投入悉尼嘅賽事。終於可以願望成真，馬主何家駒話自己心情非常興奮，佢話好榮幸可以參與珠穆朗瑪峰錦標，仲承諾今年愛駒會比去年跑得更好。另外，何生亦透露「川河達駒」將於稍後時間運港，而佢亦打算讓愛駒再度競逐珠穆朗瑪峰錦標，除非佢搵到更好嘅馬匹代替。