■李文浩議辦外張貼「本辦事處不為任何『藍絲』提供服務」、「『藍絲』與狗不得內進」嘅辱人告示。 網上圖片泛暴派區議員喺分化社會方面，比建設社區落力得多。長沙灣泛暴派區議員李文浩嘅議員辦事處非但張貼「光復香港 時代革命」嘅「港獨」標語，更寫明「藍絲與狗不得內進」嘅侮辱言論，喺網上被網民瘋狂譴責。以為自己大晒嘅李文浩非但未有反思己過，更擺出一副要炒大件事嘅架勢，喺facebook挑機話自己「未驚過」，又聲言「『藍絲』是一件物品，狗亦都不是人」。網民見佢屢教唔改乾脆揶揄佢係「李已完」，要求DQ佢，否則擔心社會將病入膏肓。
議辦貼「藍絲與狗不得內進」
網上日前流傳李文浩議員辦事處外拍攝嘅相片，照片顯示，個辦事處外張貼「本辦事處不為任何『藍絲』提供服務」、「『藍絲』與狗不得內進」嘅辱人告示，亦有「光復香港 時代革命」嘅「港獨」標語。
有關言論引起網民極大不滿，李文浩前日就喺facebook繼續挑機，話「想同大家講聲！我未驚過」。佢聲稱自己收到「成班『藍絲』、黑社會、『黑警』，輪流炸我電話，又話斬我，又話要放火」，更聲言：「有本事咪嚟囉！唔嚟正契弟！」又話「想襲擊『本土派』？你真係未瞓醒......」，企圖進一步激化矛盾。
噚日有媒體訪問佢時，佢承認辱人告示出自佢手筆，仲聲言告示內容係佢喺區議會競選時對選民作出嘅「承諾」，話自己只服務投票畀佢嘅人。當記者追問為何不服務「藍絲人士」時，佢就揚言「『藍絲』是一件物品，狗亦都不是人」，又話「如果『藍絲』是人士，這是你自己加上去的。」態度極為囂張。
自己友怕連累發帖暗寸
見佢如此這般激進嘅主動欺辱唔同政見人士，連佢哋自己友都驚被連累發帖暗寸佢。泛暴派屢屢為「港獨」站街嘅區議員林兆彬就發帖分享自己令一位「藍絲」街坊支持自己嘅故仔，話要「深耕細作、社區工作嘅意義，就係要令更多『藍絲』/中間派變成『黃絲』......今年選民登記5月2日截止，要把握立法會選舉前最後機會！」疑似佢哋自己友嘅「Sen Wong」都建議佢「應該盡量係（喺）議會內抗爭。如果真係俾人DQ就好無謂，浪廢（費）左（咗）選民個（嗰）一票﹗」
不過，李文浩意已決。網民「May Leung」留言質疑李文浩：「收納稅人嘅錢，佢憑咩可以選擇性服務呀？『藍絲』都有份出糧俾（畀）你㗎！」李文浩就大言不慚話，「我係咁講，佢錢（人工）都係要照畀。」
「Chu Pan Chai」氣唔過，話「DQ你就可以了，李已完。」「Johnny Lam 」都覺得「再不DQ，這社會病得很利（厲）害啦。」「Zoey Tin」就覺得佢??家「自掘墳墓。」「Andy Chan」話「連自己要做D（啲）乜都未知，選出此人種做區議員，民主？大家自求多福吧！」
網民要求平機會調查
「HM Chen 」就話「要求平機會調查是否有歧視不同政見的香港人，然後正式DQ了這位議員。」「Kwung Hung Tao 」則認為，「這樣的事件不處理，是政府失職。」
■香港文匯報記者 文根茂