新型肺炎令到全世界各行業受到影響，賽馬亦不例外，聽聞歐洲如法國，東南亞新加坡及馬來西亞，甚至乎美國都有唔少馬場停賽，其餘有得跑馬的地方，都紛紛仿效香港以半閉門式作賽，即使下周杜拜世界盃，杜拜馬會亦只邀請一部分相關來賓，不過此時此刻，林鄭宣布周四起香港除澳門、台灣及中國外，其餘地方返回香港者要家居隔離十四日，莫雷拉杜拜本來有「烽煙四喜」及「仁者荃心」，仲有日本坐騎「耀滿瓶」及「勝利光采」，返港後十四日內唔出得賽，咁真係要計下條數值唔值。每一樣嘢都有代價，好似雷神當公司騎師咁，有個大碼頭蔡約翰拍住，成績自有保障，不過並非有個大靠山就惡晒，馬會規定公司騎師不可替單一馬房出賽戰馬百分比多過五成，跑過大半季，有人替莫雷拉計過數，與蔡神合作百分比雖然未達五成，但所剩餘額唔多，所以未來日子雷神騎蔡廄馬應該會無寶不落。今次日賽，莫雷拉只騎三匹蔡廄馬，其中一匹便是「美麗多多」，本來打吡大賽，雷神應是夥拍「美麗非凡」出戰，但此駒上場大敗後即打退堂鼓，今次雷神騎「美麗多多」，假如能勝出，可以話是一種補償，事實上今次「美麗多多」跑四班千四米，幕後已有多少信心，此駒初出以九十九倍大冷姿態熱身，翌仗跑千四米賠率只得十二倍跑第五名，今次再來跑千四米，鞍上人換了莫雷拉，正如之前所述，現今他替蔡廄馬效力必定無寶不落，值得大家注視。