曾志偉有份的「超級綠洲」，今周日出戰打吡大賽，當然睇配搭組合必然是下風馬，事關鞍上人是選了巴西籍年青好手波健士，其實，今次打吡大賽，絕對不可用牌面騎師來衡量機會，事關因應疫情問題，很多外地好手，對於出國後的檢疫手續變得繁複，例如要強制十四日家居隔離，變相令到這些外來好手卻步。
外來好手不肯來港，角逐打吡大賽的戰駒，自然要用本地騎師上陣，例如告東尼的「孖寶兄弟」，柏寶知悉港府周四起要實施隔離令後，立即打退堂鼓，最後搞到告東尼連大師傅亦冇得選擇，「全民佳知」的練馬師姚本輝連黎海榮都擸埋，告東尼唯有用潘明輝騎「孖寶兄弟」。假如撇開配搭，根本「孖寶兄弟」是匹機會馬，所以今屆的打吡要選心水，弱配馬未必冇實力。講回曾志偉這匹「超級綠洲」贏或未必，但用波健士這位後生仔，跑三重彩或四連環配腳，不妨預牠一席。當然，曾志偉一場來到，未有頭馬拉似乎是件掃興事，不過另一匹同主馬「莫浪求」（圖藍色綵衣），今次用上郭能跑，有機會勝回一仗。以近三仗睇「莫浪求」的表現，這三仗俱是跑田草千二米，除其中一仗大敗，賽後被驗出不良於行，最近兩仗跑千二米，一仗前置好位，另一位留住衝一段，俱得第三名成績，因為留住衝一段的走勢更勁，馬房今次決定放棄這駒出爭同日曾上名的千二米，刻意增程跑千四米一試，至於鞍上人用了郭能，皆因這位仁兄騎重磅馬不需要負太多死鉛，相反，如用田泰安的話，負死鉛太多會令「莫浪求」難以發揮出最佳水準，所以從馬房如此細心的部署，今次的「莫浪求」更是值得捧場，也不可以因田泰安騎了匹似乎機會不俗的「喜佳龍」而對「莫浪求」忽略。這匹半冷馬有機會替曾志偉製造驚喜，值得大家捧場。