■有人散播區議員同那打素公關嘅群組對話截圖。 fb圖片黃營山頭眾多，今次大家食住「人血饅頭」紛紛上岸做區議員，但就日日上演勾心鬥角嘅怨婦戲碼。大埔區議會日前開醫療服務委員會，「大埔民主聯盟」陳振哲會上質問那打素醫院行政總監文志賢「點樣形容醫院與區議會嘅關係」，更印咗一大疊大埔區議員同那打素公關嘅群組對話截圖，即場派街。會後，泛暴派「熱血公民」黃兆健揶揄「先唔講咁嘅時勢開會，對唔對得住前線醫護先」，兼話唔同意隨意將對話印出嚟派街，唔少網民食住花生咁話︰「篤灰大會。」
激喊護士有前科
唔知係咪大埔區醫護唔夠「黃」，或者係咪因咩事得罪咗泛暴派區議員，2月疫情開始時，陳振哲就同「新民主同盟」周炫瑋、「區政聯盟」文念志、「西貢鄉民」譚爾培、「獨立」的姚躍生到那打素醫院，逐一詢問護士個人防護用品的數量，更與該院護士爭執，令護士落淚，病人不安。由於此舉阻礙醫院服務，院方最後唯有報警。
此事未了，泛暴派又嚟料。陳振哲在前日會議上，即場派發截圖上5條訊息的複本，顯示喺群組中有人在2月尾要求那打素「盡快安排約見」，但未獲回應。陳振哲據此質問文志賢「係咪當區議會係流嘅」。文志賢回應話，醫院與區議會之間係夥伴合作嘅關係，又話張截圖冇quote（引述）到醫院同事嘅回覆。
黃兆健事後喺facebook開post話絕不認同「黃色區議員」派聊天記錄嘅行為，又表明立場話，「對於有我在內的WhatsApp群組，公開流出對話記錄，我表示我相當有保留囉。」
唔少網民就寸爆陳振哲等人「著（着）起龍袍都唔似太子」。「Alan Mo」揶揄：「議員都叫做有公職、有身份丫，『黃色區議員』可唔可以正正經經做嘢，唔好再失禮香港人？炸WhatsApp？中學生食檸檬嗎？」「King Chan」話：「以前應該都會寫封信（要）求約見，依（??）家每天WhatApp你當約你開會，連電郵都慳返，copy and paste 同一個訊息就袋幾萬。」
佢仲話陳振哲毫無操守︰「以後還有誰敢和議員WhatApp對話，原來會印來派。」「Will Long」亦道：「私人群組對話都流出，我呼籲醫護馬上離開群組。」
網民批無同理心
可能喺自己fb儲足底氣，黃兆健仲將佢嘅抱怨帖發上大埔facebook專頁告狀，點知俾其他泛暴派支持者鬧返轉頭。「Edisy Chan」話佢：「唔show又話冇證據，show咗遮咗重要資料嘅對話又唔得？」不過，亦都有人鬧啲泛暴區議員阻住醫護做嘢，「Vinnie Lam」話︰「其實你地（哋）有無同理心，個醫院入面做野（嘢）做到根本無時間開會，唔覆WhatsApp有咩問題。」■香港文匯報記者杜思文