「中箭（香港眾志）」常委羅三七（羅冠聰），舊年8月吹雞年輕人參加暴動後，即刻「借書遁」去美國增值自己，仲成日喺美國唱衰香港有幾咁不堪，𠵱家美國疫情大爆發，羅三七竟然走返香港，俾眾多網民恥笑佢怕死，揶揄佢講到香港咁差，點解要喺「天堂」返「地獄」。羅三七惟有面懵懵咁喺facebook出post揦返拃沙，聲稱不嬲都話學期完結就會回港同「手足」齊上齊落喎。不過認真討論吓，佢個學期其實未完喎，即係唔當對佢寵愛有加嘅美國政客係「手足」啫！
同嗰啲要坐監令自己人生更精彩嘅「手足」唔同，羅三七𠵱家喺耶魯大學讀緊碩士，疫情初期喺美國一直單打香港政府抗疫措施唔夠，但當疫情殺到美國，佢又二話不說咁走返抗疫措施唔夠嘅香港。
又話學期完先返？ 記得隔離呀
睇返佢嘅打臉歷程，佢上月中喺Instagram貼相，話喺耶魯所處嘅小鎮已經進入社交隔離模式，貨架清空，商店亦都提早關門，仲話要「珍惜不尋常的日常」。到噚日美國確診破18萬，羅冠聰咁醒目，一早已返到香港避疫，再喺Instagram宣佈：「耶魯留學生涯提早完結」。咦？又話珍惜當地日常嘅。
民建聯周浩鼎亦喺facebook拍片，「溫馨慰問」羅冠聰，又提醒佢啱啱返嚟唔好周圍走，要居家隔離，又建議羅冠聰講下點解唔選擇留喺美國同3億人民一齊抗疫，同埋有冇同美國副總統彭斯交代將會離開當地。網民「chong.711」針對此事嘅評論就獲得最多讚好：「見美國奶（瀨）野（嘢），就返香港播毒，身體好誠實。」
羅冠聰就喺facebook發長文回應話：「由始至終都講得好清楚，我去讀書係（喺）為左（咗）更有學識地參與民主運動，學期完結就會回港，齊上齊落。」不過睇返佢星期一喺fb出嘅post，先話要「遙距上堂，完成埋呢個學期」，又話講好係學期完結先回港嘅？
「Itamama Cheung」就揶揄：「貪生怕死唔緊要，唔好咁揚吖嘛。」「Flora Cheung」就鬧得仲直接︰「掀起香港社會暴動，佢走為上着......現在美國大暴（爆）肺炎，佢又死返香港，作為人，你對得住地球嗎？將軍澳嘅堆填區嘅垃圾都比你有貢獻，麻煩你自動消失吧！」「Nicky Chin」就點明羅冠聰真實身份，「走狗嘛一定跑得快啦。」■香港文匯報記者 杜思文