第一場、第四班、一二○○米。「好好彩彩」五歲馬在港只九次上陣，睇吓獸醫紀錄嚇親人，右前足淺趾屈肌腱受傷、右前腿肱骨應力性骨裂及右前足淺趾屈肌腱再度受傷；前季贏田草千二大勝對手，可惜受腳患困擾冇出過賽，亦由姚本輝加盟蘇偉賢馬房，早前二月份久休復出跑三班谷草一千米得第五，之後返田草都跑得唔錯，如今終於減好分落番四班，賽前試課泥地大閘得第二名走勢對辦，分利路合馬料屆東山再起之時。
第三場、第四班、一六五○米。蘇保羅馬房的「一見傾心」，上季來港插三班起步，無贏但兩次跑季軍；今季初落四班跑谷草一哩米即贏，之後連輸七場作減分，直至前仗重落四班，不過就跑唔合腳法的田草千六米，輸咗當洗底；上仗返首本路程谷草一哩出擊，加上重戴鼻箍及綁脷，排三檔撲入第三名，走勢徹底復甦，今次操好再來大條道理變身。
第九場、第二班、一二○○米。做馬主苦等一場頭馬隨時要幾年，好似馬主何大慶，個人首匹馬「眾樂樂」未入過三甲就退役，跟住等咗五年有「知道勝」，服役時僅一勝，不過何生沒有灰心兼且信賴沈集成，終於養到匹好馬「知道必勝」。「知道必勝」上季出道至今十三戰累積四勝三位成績，表現越來越好，目前評八十三分尚未摸頂，估計季內仍可更上一層樓。