賭王縱橫商場大半個世紀，為人風趣，留下不少令人爆笑的金句，例如「肥到着唔到襪」堪稱最為經典生鬼。事緣政府2004年西九「天幕」項目招標，當時單一招標只容許數間有能力的地產商競投項目，他批評此舉不公，會讓中標財團「肥到着唔到襪！」最終，單一招標被政府撤回。
笑稱每逢新年生日食到嘔
又如他有四個太太，傳媒有時故意煽風點火找話題，他都能機警的一一化解，並且做到對四房人都公平。如問他哪位太太最靚，他會答「梗係個個靚啦，唔靚就唔係我老婆啦。」最錫哪位太太？「四個都咁錫，齊人之福唔易享，一到新年、生日，就走到氣咳，食到嘔凸，但都要照食！」
