■戴耀廷前日先改完口風，到咗噚日又發帖宣傳眾籌，即惹來網民批評。 戴耀廷fb截圖謀煽惑民意「又食又拎」 網民促速停手
乜嘢係走過最長嘅路，就係攬炒派嘅套路囉。人稱「戴妖」嘅戴耀廷日前牽頭整咗個攬炒派初選，並開始放風，聲稱會讓大家簽署由佢草擬嘅所謂攬炒協議，以此「凝聚」唔同派系，但當好多人上鈎時，佢突然又改口稱唔會傻到畀政府DQ嘅理由，執行協議可單靠大家已經形成嘅「信任」而唔使簽約，隨即引發激進攬炒派不滿，自行公開簽咗個「抗爭派立場聲明書」，逼到戴妖不得不諗個新招數應對今次「信任」危機，就係扮可憐再搞眾籌，但就俾人鬧淨係識叫人「入錢」來操控選舉。
■香港文匯報記者 文根茂
由戴妖同攬炒派區諾軒牽頭搞嘅所謂「民主派35+ 公民投票」，仲未開始投票就內訌不斷。戴妖對參與初選嘅人是否需要簽署共同協議態度曖昧，而攬炒派中人亦各自心懷鬼胎，為政治利益互相拆台。眼見初選或面臨夭折風險，戴妖一改以往堅持嘅「不能為當權者製造借口去『打壓』任何一個人」主張，喺facebook再次改口。唔知呢個操作，係咪為着未來真係有攬炒派被DQ而鋪排嘅一個「無關我事」嘅脫身理由。
改口棄簽協議惹不滿
佢前日喺facebook發帖公開自己發畀攬炒派參與初選各團隊嘅訊息，稱向大家致歉，唔簽署協議係佢嘅個人決定，唔希望由佢手上產生一張有可能被DQ嘅名單，但之後又話，是否簽署聯合嘅聲明「是大家自行的決定。無論是怎樣，我都會尊重。」並聲稱，「若我再不能得到大家的信任，我也不適合繼續去統籌這次公民投票了。」
稱越吸錢越有信心吸票
話口未完，戴妖噚日喺facebook發帖煽動大家畀錢眾籌，話無論係乜路線，「若你希望見到35＋最終能成功，就不在於是由甚（什）麼人號召或統籌」，並叫人支持「民主派35+ 公民投票計劃」眾籌，並廣傳眾籌網頁，而網頁上仲明言「越多資金，我們就越有信心能讓最多市民投票，並確保各票站順利運作。」
多年來見慣攬炒派伎倆嘅網民就唔買賬。「MH ManHo」話「『泛民』果然摵唔甩大台同入錢」。「Tokutaro Law」就話：「你班政棍咁×多錢，仲要向冇權冇勢的蟻民乞錢搞眾籌？」「Stanley Kam」直言：「騙徒出沒。小心。提防。」「Wai Hang」都話「捐錢畀你去操控選舉？不了。」
「Man Li」就話「呢啲叫漁人得利......一到要投票嘅時候，佢呢啲人咪走出嚟同你講捐錢捐錢囉」，又話呢班人連「香港『獨立』唯一出路，『光復香港時代革命』都唔夠膽講呀」，暗指班人根本另有所謀。
「Henry Chung」就覺得對於初選嘅細節，「『泛民』各路分歧，說明內部存在分裂時日不淺，團結之心原是謊言。」叫佢放棄「35+」及七月初選，等選民九月自己決定。「Jessie Michèle Luk」就質問佢，「為什麼你仍然死心不息去攪（搞）選舉？為左（咗）證明你自己？為左（咗）修正當年的雷×計劃？......以為自己幫香港，其實是自己執念，放唔低自己不受香港人歡迎，及執著（着）於自己過去的失敗計劃。」