第六場「青心星」上場被「得益良多」鬥燒之下仍可頂到拉士得第二名，仲算賽績水準甚高，今次轉來泥地上陣，查曾試泥閘大勝五乘，質新進步兼輕磅有勝望。「好友益」七歲馬季內取得三捷，而且對上五場全部入前四名，徐雨石操養老馬確實有一手，今次泥地再接再厲有力創佳績。
第七場「恆駿寶駒」上場排外檔照樣輕鬆贏馬捧走施偉賢盃，可見馬房操養方面確有一手，今次原班再戰大可梅開二度。「金剛石」隨同主「金剛秀」歸隊加盟鄭俊偉馬房，前仗易廄初出泥地熱身後，上場轉來田草千二米立即郁手跑第二名見急進，今次加程更利追趕，出頭在即。
第八場「加州凱歌」在港三戰獲一冠兩季全上名，近兩場轉去泥地上陣表現更加出色，上場受制於變化場地未竟全功，今次跑番正常場地可還以顏色。「錶之銳」目前評七十六分比上勝時只高一分已有利可圖，今次有大樹遮蔭防見獵心喜。
第九場「超勁勇士」換潘頓兩戰得冠亞軍各一，今次棄同日勝途千四米越程跑千六米，應是深思熟慮部署可期再贏升班去。「日就月將」血統偏向中長途，與同父廐侶「好好瑪」性能相似，上場千四米九十九倍跑第四名，實力經已徹底露光，今次加程料胸有成竹。
第十場「線路光輝」今季九戰尚未贏馬，惟上場田草千四米後上第四小敗不足兩馬位見復甦，比上勝時已低十分及跑低一個班次，在此足以打翻身戰。「鎮山寶」易廄後五戰全跑田草千二米獲一亞一季兩殿，今次打王牌加程跑千四米用意正面，有望在此敲響勝鼓。
第十一場「牛角仔」上場小休三個月復出在千二米取得季內第三場頭馬，四歲馬如日方中升勢未止，今次再面對一批蹄下敗將，必定把握機會盡拚，仍可視為爭勝之材。「大紅包」今季四捷包括三種場地，可見性能極之廣泛，六歲馬頗有大器晚成之感，勝後狀態有增無減，恃勇力足再捷。