【資料速遞】如沐春風鄭廄主力

2020-07-03

幾乎年年要打護級嘅鄭俊偉，今季一早贏夠十六場上岸，最近亦有「有毅君子」建功。有人覺得既然已上岸，應該盡快鳴金收兵，留番啲子彈下季再嚟過，如果唔係今季贏凸咗，萬一下季唔夠數咪大劑！呢種諗法真係好多餘，首先，如果真係做到留番下季就贏到，咁就唔使年年打護級啦。無錯，兵源係有限，但有時馬匹狀態嚟到，唔通真係因為夠數，就即刻收埋話唔搏咩，幾大都要贏咗先講啦，事關有成績先至有支持嘛。今次五班長途鄭廄五駒列陣，而且都係季內未贏之輩，隨時贏馬包Q都唔出奇，出擊主力應該會放在「如沐春風」身上。