冠軍騎師之爭幾乎肯定潘頓成功三連霸，莫雷拉今季冇蔡廄神馬加持，少了十多場頭馬固然是關鍵，季尾狀態回落對住潘頓例輸，幾場「來回W」輸晒氣勢，再加上自毀長城，季尾多次斜跑停賽，若然停賽罰則未因疫情缺乏騎師而放寬，雷神或會更小心策騎，但只罰一日根本唔會理會，最唔小心就最易中招，上周日出事嘅「幸運快車」初出斜跑已有前科，呢鋪阻到潘頓匹「駿皇綵」拉停咁滯，點打都打唔甩了，拎唔到冠軍怪得誰？好喇，現時大眾焦點，已全部移到練馬師大戰之上，筆者是貼姚、呂、東順序三重彩，當中沙田一哩錦標，輝哥「旌暉」同「友誼至好」雙龍出海，個人睇好有路程根據的「友誼至好」。