香港國際馬匹拍賣會（7月）上周五晚於沙田馬場馬匹亮相圈舉行，由於有多駒退出，最終只得十九駒供競投。今次拍賣會比上次五月時交投踴躍，十九匹拍賣馬錄得七千四百三十萬元成交，相對於成本價五千五百多萬元，馬會共賺千八萬元，五月時馬會要蝕九十萬元。今次拍賣會中，編號1、5及16曾於5月拍賣會退出，馬會安排在今次再推出競投。全晚最高成交價是編號8，以七百二十萬元由「和氣生財」馬主司徒建新投得，略高於成本價七百萬元。下季回流香港開倉的希斯也有現身，他與未來副練黃志雄、楊明綸與蘇狄雄合照。當年希斯在港做練馬師時，其副練是李易達，而楊明綸乃李易達徒弟，計一計希斯即是楊明綸師公。希斯在今次拍賣會亦有收穫，「蝦王」系馬主劉錫康與友人合資以五百萬元投得編號16，並會交予希斯訓練。
外地馬圈消息方面，歐洲馬后「成全寶」今年繼續服役，全力爭取第三度贏法國凱旋門大賽。經過八個月嘅休息，「成全寶」日前喺英國沙丘園馬場復出，角逐二千米一級賽日蝕大賽，並交由好拍檔戴圖理執韁，自然被捧成大熱門。不過，呢匹歐洲馬后唔知係咪唞得太耐，末段衝刺唔算太強，拉士追極都追唔到放頭嘅「既成事實」，只能屈居亞軍，第三名就係早前由日本馬主購入嘅「日出之國」。雖然復出只係跑第二名，但戴圖理都好滿意「成全寶」嘅演出，並相信稍後出戰更合腳法嘅英皇錦標會有更好表現。至於高多芬名下嘅「既成事實」，今年真係光芒四射，三戰全勝之餘，上仗先喺加冕盃贏「御用畫匠」同埋「弦樂器」，依家又贏埋「成全寶」，莫非今年歐洲馬王係佢？
另外上周日轉播賽頭場法國打吡大賽二千一百米國際一級賽，開閘前着綠燈落到八點五倍、由高仕登訓練的英國代表「萬勝飛」，今次改用騎師曼迪沙寶，全程居馬林，入到直路雖然搵位有阻塞，但最尾都能夠望空並以勁勢上前，壓下亞軍「登頂峰」及季軍「總冠軍」，奪下服役以來第三捷，更為幕後拎到約四百四十七萬港元頭馬獎金。另外值得一提的是，今場跑得殿軍「日出玲瓏」，係由前香港練馬師孫達志訓練。岳伯仁先拎下葉森橡樹大賽，再底出大冷「蛇紋石」第八次捧走英國葉森打吡大賽，事隔一日到佢囝囝岳品賢威喇，在法國橡樹二千一百米，古摩亞三戰得兩冠一亞的馬女「珍稀藍鑽」，一路跟守好位，拉士同亞、季軍「星耀峻嶺」及「安恬」鬥足大半條直路，終在法國冠軍騎師布達德胯下鬥贏，值得一提呢匹係日本馬王「大震撼」子嗣，今次成功報上仗愛爾蘭一千堅尼之仇，反先「安恬」首奪一級賽殊榮。