■ 伍樂城（左）表示唱片公司有空間讓他去發揮，所以他就為Twins做校園歌。香港文匯報訊（記者 梁靜儀）音樂人伍樂城（Ronald）日前為音樂訪談節目擔任嘉賓，大談與謝霆鋒、古天樂、 Twins等歌手合作趣事。
伍樂城表示首次做監製是謝霆鋒的《無聲仿有聲》，他大讚霆鋒非常勤力：「嗰時我冇諗過自己可以咁快做到監製，都係自己交歌時大膽問不如畀埋我做監製，霆鋒好有耐性，唔休息，不斷唱同彈結他，見佢九成九都係咁，印象中佢好似唔食飯𠻹。」他又大讚古天樂：「佢係一個不斷唱，唔休息嘅人，一撳掣音樂起佢就唱，佢會嘗試做到我嘅要求為止，唔叫佢停都唔會停。」
談到經常合作的Twins，伍樂城就多謝唱片公司有空間讓他任做，他又透露Twins錄音有個習慣：「佢哋好忙，又要拍廣告拍戲，佢哋好多時都係攝時間上嚟錄，有時上到嚟都會瞓一陣先，好記得《士多啤梨蘋果橙》，知道第二日有個錄音期唔想錯過，於是半夜兩三點打畀填詞人，話個半鐘頭後有首歌畀你填，咁第二朝就有得錄啦！我諗呢次係由未創作到可以錄音最快手嘅一次。記得副歌嗰句『士多啤梨、啤梨、蘋果、橙』，創作旋律時自己已經諗到，好彩啤梨都係生果！」
蔡卓妍（Sa）亦有現身節目，她自爆被伍樂城笑指唱歌似任劍輝說：「我哋錄《明愛暗戀補習社》同《女校男生》係同時間錄，錄錄吓《明愛暗戀補習社》，又去錄《女校男生》，再錄返《明愛暗戀補習社》，我本身有鼻敏感，鼻音好重，唔知點解我唱歌會好用力，所以伍樂城同Mani（霍汶希）成日話我唱歌好似任劍輝，用平喉去唱時代曲咁，Ronald好好，通常錄音會唱一次畀我哋聽。」