「屯門社區網絡」連日嚟不斷抹黑政府免費嘅「社區普及檢測」計劃，聲稱市民嘅DNA等個人資料會被中國檢測機構「送中」，於是近日就自行搞咗個350蚊「成本價」嘅「民間檢測」計劃，結果被大批網民質疑過程涉利益輸送，甚至外洩個人資料。眼見質疑聲音隨時令佢哋冇咗個賺錢機會，呢班區議員噚日就撲出嚟幫大家「釋疑」，點知就愈辯愈亂。
拒交代檢測機構
最多網民擔心有關的檢測機構嘅專業資格，同埋過程中會否外洩個人資料，但噚日「屯門社區網絡」就帶大家猛遊花園，仲不停自打嘴巴。佢哋喺facebook發文話「絕對唔鼓勵無緣無故走去檢測」，但「相信大家明白，及早辨別確診者，對於及早阻截傳播鏈係非常重要」。既然唔鼓勵點解仲搞檢測？佢哋就聲稱好多工種都要求有檢測證明先可以返工，相信好多街坊都有需要喎。
有網民問到檢測機構資料，但佢哋答完好似冇答，只稱合作夥伴係「Project Home Kong」，「（會）善用我哋科研產業嘅成果、專業嘅化驗所，為香港人提供安心、可靠嘅檢測服務。我哋合作嘅醫療機構都係紮（扎）根本地嘅港資公司。」
違諾持身份證號
喺個人資料方面，佢哋多次聲稱化驗所唔會持有任何樣本嘅個人資料，但當網民「Man Lostman」問：「化驗所官方report（報告）會有寫我個名、身份証（證）同檢測日期？」該組織其中一位區議員黃丹晴就自打嘴巴咁答：「有的。」
「joe leungho」就話：「又唔知你邊間化驗所，一陣做咗公司唔認受咁點？其實好多私家醫生都有呢個服務啦，你又唔係特別平」。「Terry Lam」則暗寸佢哋身為攬炒派，「竟然支持政府政策」：「既然民間自發，就更證明有迫切需要」、「政府贊助還政府贊助，民間主動還民間主動，不過政府見你地（哋）咁支持順勢推之嘛，完全合理。」 ■香港文匯報記者 鄭治祖