■ 關楚耀相隔兩年再為無綫拍劇。香港文匯報訊 （記者 梁靜儀）李佳芯、馮盈盈、關楚耀及農夫等昨日出席無綫新劇 《智能愛（AI）人》（暫名）拜神，首次出任男一的陸永，在劇中更會被李佳芯與馮盈盈爭奪。關楚耀相隔兩年再為無綫拍劇，感覺興奮。
陸永被問及首次擔任男一，他謙虛說：「唔好拘泥呢啲，只係一個男角色，女主角就有李佳芯同馮盈盈兩個。（劇中周旋兩女之間？）點解我話我唔係男一，因為佢哋爭我啲戲份我都唔在場。」問到可有激情戲？馮盈盈表示暫時劇本未有，如果劇情需要都不介意。陸永即追問：「妳想加？（佳芯和盈盈只能揀一個？）佳芯係機械人，冇激情啲配套。」
他又笑指劇本寫他的角色是外表極其俊朗，現在變了諷刺。問盈盈可擔心忍不到笑？她謂知道陸永轉數快又多主意，所以事前都要做好功課接住他的戲。陸永亦讚盈盈上完正音班後講話大有改善，以前只聽到她兩成說話，現在全都聽得到。
關楚耀相隔兩年再為無綫拍劇，劇中飾演AI公司的老闆，他表示一個月前收到消息時已好興奮，當知道角色略帶奸兼好神經質，遇有少少唔開心就掃枱就更加興奮，他笑說：「 屈咗屋企幾個月，可以攞正牌發洩，因為我喺劇裏面專鬧馮盈盈，（不怕盈盈聲音刺耳 ？）我睇佢啲綜藝節目，覺得佢好溫柔，有咩講咩，呢啲至真。」問到與李佳芯及馮盈盈可有感情戲？他說：「暫時冇，但加緊集數， 都仲有機會加。」