■林頌鎧普檢宣傳海報。 fb圖片攬炒派連日抹黑政府的普及社區檢測計劃，仲動員抹黑叫市民杯葛，但出現「同路人」唱反調。普及檢測噚日起開始在網上預約，協助居民登記嘅幾乎只有建制派區議員，但加入咗民主黨近23年，今年初先退黨嘅屯門區議員林頌鎧，就熱心到整埋宣傳海報，仲叫街坊可隨時去佢辦事處登記𠻹，結果俾「黃絲」大鬧佢「支持出賣港人DNA資料」，又重提佢去年掛住民主黨牌頭參選，點知上任翌日就退黨，令網民紛紛質疑佢呃選票，更有網民威脅佢若再支持普及檢測，「下屆可以唔洗（使）做了。」唉，支持檢測又被「黃絲」鬧，唔幫登記又俾街坊唾棄，睇嚟呢班區議員為咗3萬元月薪，遲早要向「黃絲」屈膝叩頭啦！
攬炒派針對普及檢測嘅抹黑多不勝數，同林頌鎧同區嘅一班「屯門社區網絡」區議員，更喺日前搞咗個「350元成本價民間自救檢測計劃」，聲稱唔可畀政府將港人嘅DNA資料「送中」喎。不過，林頌鎧近日就好細心咁整咗張海報，列晒區內所有檢測中心嘅地址，仲附埋網址逐步教街坊登記，又話佢同辦事處職員都會協助大家預約呢個免費檢測𠻹。
呢啲情況喺「黃絲」眼中簡直係「作反」，網民紛紛質問林頌鎧係咪支持普及檢測，但「Lester Leung」就覺得講多無謂：「佢出曬（晒）紙叫人去同支持冇分別啦，居然支持出賣DNA，屯門最垃圾區議員之一」「Chan Alvis」亦話：「佢不嬲都平行時空，之前垃圾銅心（銅芯口罩）都有幫推」。
面對「同路人」嘅質疑，林頌鎧就急急「澄清」：「其實我無特別支持檢測計劃，祗（只）是想俾（畀）啲資訊本區街坊，想檢測的街坊可知道本區最近的檢測中心位置，而有街坊唔識上網預約，我哋可協助吧！」
點知「Ken Lui」嘅「黃絲」被害妄想症就發作：「你收皮啦，你不單止唔應該支持，更加要嚴正地反對，要話俾（畀）街坊知呢個全民檢測嘅『禍害』。你提供資訊，『協助』街坊預約，只係做咗政權嘅『幫凶（兇）』。」
踢爆選後即退鴿黨扮獨立
「Alex Chu」就踢爆：「選前民主黨呃選票，選後即退黨扮獨立去避談爭取民主......香港人要睇清一D（啲）政棍！」「Chan Alvis」就補充：「用民主黨3個字去選，跟住上任第二日就退左（咗）黨」「Juana Chau」就幫手「解釋」：「白鴿黨賣香港，你唔記得呀？退黨保平安」「Carmen Leung」就威脅：「你竟然支持？咁下屆可以同你講再見」。
「Michael Tsui」就認為，林頌鎧為咗箍票，點都要幫吓街坊填表，而且有人真係因為工作關係需要檢測證明，無理由叫人哋搵過份工，佢又建議：「你問我的話，我只能做雙面人：上網就×，喺社區就單純提供資訊，亦唔主動幫人登記，有人問到就做，但係其實咁唔主動，本身已經係好Risky（高風險）。」■香港文匯報記者 鄭治祖