羅家英香港文匯報訊（記者 李思穎）羅家英應老友苑瓊丹主持節目《開工大吉77》訪問，出身自粵劇世家的家英哥，從小受到爸爸教導要把粵劇文化傳承下去，家英哥銘記於心，沒有遺忘父親的教誨。
家英哥說：「爸爸話全靠華光師傅賜啖飯畀我哋食，仲話做戲唔係低下階層，係社會一分子，所以要求我將戲曲同粵劇傳頌落去，做人不能忘本！我由73年開始已經為粵劇宣傳，不時要去為新一代上堂。現在我幾忙㗎，有五個徒弟、百幾個學生啦，我愛人都不時嚟幫手指點，唔係教佢哋功架，教佢哋做戲。」
苑仔當然不放過機會，追問他和老婆汪明荃拍拖逸事，家英哥笑指招架不住，惟有坦白交代。苑仔問他如何吸引阿姐，他笑說：「我都唔係好明白，佢都冇同我講，點知佢鍾意我咩？我對佢唔算細心，又唔算好遷就佢，外界以為佢惡過我都好正常，因為佢對工作好嚴謹、要求好高，諗住佢對羅家英都係咁，實情係......都差不多啦，我好難講得出口，好難答！」家英哥自言不浪漫，為給阿姐名份而結婚，笑指自己思想陳舊：「我哋冇示過愛，第一次拖手係過馬路，拖吓放手又拖吓咁，之後睇戲佢話好驚就拖住我，大概係咁啦。」
二人先後經歷大病，過程中互相支持，撐起對方的心靈：「其實係阿姐病先嘅，我記得有一次佢喺內地開會，突然打畀我話要返香港睇醫生，咁我咪去接佢囉，知道要做手術佢都驚驚哋，全靠我喺旁邊做大男人，『保護你，唔使驚，有我喺度！』佢好感動囉。」