■鄭嘉穎與陳凱琳夫妻檔拍廣告，重演經典場面。香港文匯報訊（記者 李思穎）陳凱琳（Grace）上月誕下小兒子後，極速修身成功，回復產前的苗條身形，早前已出關約同囝囝契爺黃智賢齊齊整甜品，最近便同老公鄭嘉穎拍住上搵奶粉錢，「夫妻檔」合拍韓國品牌的洗頭水廣告，在廣告中更重現韓國劇集《夫妻的世界》經典場面，令觀眾拍案叫好。
嘉穎和Grace化身韓國劇集《夫妻的世界》海報中的男女主角朴海俊及金喜愛，Grace穿上浴袍騷出白滑美腿，嘉穎就輕撫太太美腿，重現誘惑甫士，Grace見到老公在社交平台分享這張相時，即秒速回應讚sexy，接着，Grace便把廣告片放上網上分享，兩人把劇中最難忘畫面即女方發現到男方身上一條不屬於自己頭髮的情節演繹出來，但見兩人相當入戲，久未復出拍劇的Grace可以乘機大過戲癮。
Grace留言：「唔知大家早前有冇睇過非常受歡迎嘅韓劇《夫妻的世界》呢？ 當中最令人難忘嘅畫面當然就係女方發現到男方身上一條唔屬於佢嘅頭髮啦！不過我哋嘅版本就有啲唔同，話說我陀（佗）第一胎嘅時候，出現咗甩頭髮嘅情況。當時真係好擔心（相信好多媽媽同我一樣都唔知點算）！不過有咗經驗之後，喺第二次陀（佗）BB就識得護髮嘞！大家睇到我老公嘅表情就知道：甩頭髮？ 唔駛（使）怕！」
龔嘉欣、岑麗香、黃嘉樂等藝人見到這條片均大讚「正呀」，「so cute」，有網民就說好想看他們演香港版《夫妻的世界》劇集。