栽贓「藍絲」打人圖轉移視線：連記者都打嘅暴徒係「手足」？
被細數多宗罪嘅「Lunch仔」（李國永）日前唔單止被「手足」圍插，更俾睇佢唔順眼嘅「同路人」威脅要打佢。話說佢日前去元朗南邊圍「和你買樓」，終於被三個穿黑衣嘅男女「私了」，被打之後嘅「Lunch仔」就報警處理，令「手足」被拉，而網上嘅聲討之聲更加震耳欲聾。不過，「Lunch仔」就「臨危不懼」，識得栽贓畀「藍絲」，仲話：「一個連記者都打嘅暴徒會係『手足』？」其實，被鬧又被打，咁都認唔清「黃絲」真面目嘅「Lunch仔」都唔知係扮傻定真傻。
■香港文匯報記者 文根茂
「Lunch仔」日前搞「和你買樓」近尾聲時，喺朗屏西鐵站附近被三名穿黑衣嘅男女尾隨。佢聲稱期間被人言語騷擾，用雨傘扑頭、「篤肚」，而從現場嘅視頻睇，「Lunch仔」不斷高叫對方「偷襲」自己、「好痛」。同行嘅網媒記者亦疑被打傷，頭部腫痛，手指亦都喺阻止對方逃去時受傷流血。
「Lunch仔」對呢啲傷害自己嘅行為，毫不手軟即刻報警，警方事後回覆話，事件中以「襲擊致造成實際身體傷害」拘捕一名15歲林姓男子。
報警遭「同路人」圍插批過街老鼠
「Lunch仔」報警嘅行為，好快引來「同路人」嘅新一輪圍插。佢哋唔關心佢真係被人打，而係將佢報警拉「手足」當成佢嘅新罪行，狠批佢係過街老鼠，更聲言「差在未打死佢」。不過出名「心態好」嘅「Lunch仔」就喺毫無理據嘅情況下，聲稱係「藍絲」唔夠佢講就搵人打佢同記者，又懷疑施襲者同「7．21事件有關」，暗指並老屈係「藍絲」打人云云，企圖轉移視線。
但啲「同路人」就唔收貨。網民「香港小孩」就鬧佢：「只係使用呢場運動令到自己更出名。佢同佢嘅支持者從支持佢報警捉手足嗰一刻已經再唔係我哋嘅手足，......黃絲唔係唔使認錯嘅藉口。」「蛋炒蕃茄」仲鬧埋幫佢宣傳嘅「黃媒」：「好多人就咁睇新聞冇上連燈（登）根本唔知條白卡仔做過啲咩戇×野（嘢），蘋果立場仲係咁幫佢宣傳。」
推諉無效「Lunch仔」鬧返「同路人」
見推諉無效，「Lunch仔」噚日就鬧返「同路人」：「將自己嘅意見強行加於別人身上，只要意見同你哋有分歧，就揾人打你私了你，咁做同黑社會有咩分別？」
「強大」嘅「Lunch仔」當然唔會被呢啲閒言碎語打敗，噚日佢就喺facebook發帖話「今次我會當係一個考驗，考驗我對『抗爭』嘅決心，係（喺）逆境下堅唔堅持得住，而今次亦都係訓練自己嘅好機會」，又叫人放心話「係（喺）末（未）來嘅日子就算預（遇）到再多難關都好，我都唔會退縮......繼續做自己認為啱嘅事。」睇嚟又可以買定花生，睇好戲囉。