郭家麒放風扮冤枉 「同道」話唔會再投飯民
要求「制裁」定係唔「制裁」，原來關乎嘅係個人利益嘅問題。由於種種違誓行為而被DQ嘅公民黨郭家麒噚日喺電台接受訪問，佢一方面承認司法覆核好有困難，一方面更聲言該黨「有成員曾經向美方表示不要輕易制裁香港......只係當時冇向外透露」，一改往日高調聲稱要求外國「制裁」香港嘅講法。咁都講得出，搞到班「黃絲」係咁揶揄佢𠵱家先講，仲有無再核突啲，仲恥笑佢哋咁快跪低表「忠心」，直言就算之後佢哋有得選都唔會再投飯民呢。
■香港文匯報記者 文根茂
此前為咗取悅班激進分子，郭家麒等攬炒派係咁張揚自己喺外國爭取制裁香港嘅「豐功偉績」。啱啱無咗份筍工嘅郭家麒唔知係唔係接受唔到失業打擊而精神分裂，噚日竟喺電台「爆出」個「驚天大秘密」。
佢聲稱，有公民黨成員曾經向美方表示唔好輕易「制裁」香港，因為香港唔想受經濟打擊，只不過當時「冇向外透露」，又話公民黨都希望香港亂局會停，想對方以外交途徑與中方或香港交涉，但事實又係點呢？（見表）
鬧爆賣「手足」 「有冇再核突啲」
講到似層層，唔知實情真係會以為煽暴亂港嘅唔係佢哋，聽完唔少人都「嘩嘩聲」。??家發覺攬屎上身又想脫身，「黃絲」梗係唔肯收貨。
「漂泊的何俊仁」批評郭家麒：「咁快跪，垃圾。」「砰焦轟隆銀呀」話：「而（𠵱）家先咁講，仲有無再核突D（啲）呀！」「華裔港人」恥笑佢哋：「冇曬（晒）霸氣。」「Chaserwong」就好奇：「咁依（𠵱）家即係攬唔攬炒呀？」「行屍走肉」就話：「乜都驚，唔好話自己『抗爭』，翻（返）屋企訓（瞓）覺啦！」
冇啦啦提呢啲肯定會俾「同路人」圍插嘅往事，唔通真係要人信你回頭是岸咩？「黃前久美子」就分析：「表忠囉......我冇叫美國政府制裁香港呀，『微臣』冤枉呀......我哋公民黨仲想選，唔想滅黨呀。」「 Djilobodji」就睇得通透：「都係月入10萬緊要，『手足』？」「『屎』路比」：「唔知今次班販（飯）粉仲可以點死撐。」「威爾斯」就直言「就算下年有選舉，都唔投飯民。」
都係全國政協常委唐英年講得啱：佢噚日喺出席一個公開活動時表示，香港係法治社會，佢哋可以就被取消議員資格一事提出司法覆核，但提醒如果辭職嘅議員日後想再參選，始終要由選舉主任決定去評估佢哋係咪擁護基本法和效忠中國香港特區，所以佢哋應該透過言行表達出真誠悔意，「現在犯錯不等於一生犯錯，隨着時間、環境及年齡的變遷，可以獲得更新的機會，但必須要透過言行舉止平反及表示真誠悔意、願意擁護基本法和效忠中國香港特區，將以往嘅錯誤行為undo」。但佢補充，係咪容許呢班人再參選，決定權始終喺選舉主任度。
被問及是次全國人大常委會的決定會否適用於區議員，唐英年話，區議會選舉3年後才舉行，不知道未來如何，但相信選舉主任會持平及客觀咁處理。