第一場、第五班、一二○○米。「趣怡」上季來港由大摩訓練五戰無功，之後散倉加盟方嘉柏，暑期送上從化訓練，今季轉四歲成熟躍進，大前仗跑四班千二米，後上跑第八，該賽有「龍鑽輝煌」及「北極光」再出贏馬；前場初落五班即大幅落飛，直路初曾經受困，到最後百幾米移入內疊才能夠望空，隨即交出強勁衝刺，只輸個幾馬位跑第二；上次加程千四米欠點氣量，今次轉場縮程正合發揮，有力打開勝門。
第六場、第四班、一二○○米。「日日靚」上季尾踏上升軌，六月在谷草千二米用楊明綸，輸鼻位給其後再贏兩場的「英明勇將」，落敗非戰之罪；翌仗加程一哩用雷神立即補中之後唞暑；踏入今季初出，於谷草千二米遇上極慢步速，末段快至廿二秒六下，自身交出廿二秒二衝刺追回第四，其實已非常難得，之後三場加程一哩都跟得接近，今次縮程信馬房兵行險着，一於贏位兼投。
第九場、第三班、一二○○米。「孖寶」在港出賽十六次，除當中兩次配潘頓之外，其餘悉數由蔡明紹主轡，可見騎者深得幕後信任，上季尾跑到流鼻血，前景當然令人擔憂，今季唞逾四個月復出谷草千二米排十二檔，早段留到尾列，全程走三疊得第四；翌仗再出立即輕鬆贏馬，上場面對超班馬「達心星」按兵不動跑第五，今次拆組避開強手，起步後順跟順走有力還以顏色。