■ 左起：鄭丹瑞、陳豪、王浩信、伍詠薇和林盛斌。香港文匯報訊（記者 李思穎）邵氏出品劇集《非凡三俠》三位演員王浩信、陳豪和鄭丹瑞（旦哥）同是爸爸級紅人，早前他們接受節目《Tiger's Talk》的主持人伍詠薇和林盛斌（Bob）訪問，分享與小朋友相處點滴，王浩信和陳豪自爆在孩子口中有另一個稱呼，王浩信女兒會叫爸爸做Bro（兄弟），陳豪則搞笑指被子女叫錯做姐姐，可見他對小朋友是任勞任怨，是個24孝嗲哋！陳豪透露三年抱三，只是抱佛系心態。
伍詠薇同阿Bob以「型爸」來形容三位嘉賓，罕談家事的王浩信破例大談與8歲女兒的父女關係要好，他謂：「我哋個世界都仲係一齊，大家會傾心事，我會把拍戲情況告訴她，放假時候會一齊去做運動、睇書、打機，佢學識游水同踩單車都係我親自教識，有時佢直情唔小心叫我做Bro（兄弟）。」同樣是爸爸的Bob羨慕不已，他笑指家中4個小朋友經常錯叫他做「媽咪」，難免醋意大發，陳豪仲搞笑：「你都好啦叫媽咪，我啲小朋友叫錯我做姐姐，佢哋有時口快快！哈哈」
冀一直維持「兄弟」關係
陳豪的三個小朋友分別6歲、5歲和4歲，對於他三年抱三，連Bob都讚他厲害，陳豪即時面紅說：「唔係刻意，不過一行埋就有......」他認為論子女間的溝通還早，因大仔才剛剛升上小學一年班，他說：「佢學緊游水，我哋先經歷到佢唔可以再入女廁等媽咪幫忙，變相游完水要自己識得沖涼，慢慢去學，佢仲係好細個。游水就交畀教練教，讀書寫字，特別係中文字就我教，冇辦法，屋企得我一個識中文，起碼學識寫自己名字。」
面對兩位年輕爸爸，旦哥的兩個女兒已經快滿30歲，他直言自己是開通爸爸，細女學鋼管舞都非常鼓勵，直至她表演邀請一家三口捧場，旦哥說：「300幾蚊，我哋一家三口去，起初都冇乜事，突然扯開衫褲着T-back加Bra Top，我同老婆嚇一跳......完騷就梗係照樣話跳得好好睇，Very Good，表面上冇乜嘢，呢種舞係要咁性感先好玩，我當然照畀佢玩，不過之後就唔會再去睇。」他說周日是家庭日，就算細女搬出去住，都會自動自覺返家食飯，還會帶同外籍男友回家一齊打麻雀。
問到會否接受女兒帶男友回家？王浩信唉聲嘆氣說：「我就係想維持Bro（兄弟）關係，將來（女兒）真係拍拖都唔好離我太遠，被人hurt完都返嚟話我知，等我開解佢，唔好自己暱埋。由細細個開始建立友誼，可能將來佢去蘭桂坊會帶埋我呢？」身旁的旦哥即報以冷笑。