第一場、第四班、二二○○米。今場霍利時馬房雙龍出海，「甲烷」質新當起多數馬迷以為屬馬房主力所在，但咪睇「情趣」已係八歲老人家，季內初出跑三班谷草一哩得第五，同「鴻圖巨星」差唔多一齊返，可見爛船仲有三斤釘，之後再輸多四場，目前評五十五分處低位，幕後黃頌顯乃霍利時忠實擁躉冷熱無拘志在贏馬，今場有大樹遮蔭，到時分多兩蚊可能更妙。
第二場、第五班、一八○○米。馬主為關永樂與關劉麗霞的「行樂之光」，其同主馬「歡樂之光」曾勝一級賽香港盃，但因為右前腿不良於行同腳掌腫脹，久休一年目前仍在休養生息，估計復出都唔太理想，所以幕後爭勝重任會放在「行樂之光」身上，此駒同法國二千堅尼盟主「奧美度」及澳洲墨爾本盃冠軍「信誓旦旦」同父，長力遂不成疑問，上次二千二百米已試準，今次縮程可現真身。
第六場、第三班、一○○○米。開季至今有唔少七歲或以上嘅老馬勝出，好似「英明勇將」、「蒙古王」及「線路光輝」等，今期有匹七歲馬「駿皇綵」，大摩退休後，馬主譚少強仍肯保留佢，並與同主「駿皇星」一併轉至文家良馬房，應仲有後着。「駿皇綵」今季初出田草直路賽，S形走位衝入第四，發揮好少少隨時有位置，難得幕後繼續俾機會梁家俊，目前評七十五分重返上次贏馬時水位有利，騎者肯定搏盡報答支持。