第五場、第四班、一二○○米。五月份馬會精選拍賣會，全場焦點落在「巴基之星」馬主丁志強以六百五十萬元全場最高價成交的「巴基勇士」，在馬主丁志強而言，六百五十萬元或許只係其九牛一毛，既不用跑山度水，又不用暗中問借，只求於「巴基之星」及「巴基之友」後，有機會再嚐勝利感覺。如果大家有能力都想買得心頭好，反正萬般帶不走，為何不盡力追尋自己的夢想？而且「巴基」兩匹拍賣馬都係一出即勝，今次「巴基勇士」一炮而紅也不必驚訝。
第六場、第三班、一○○○米。「時時好綵」今年二月尾在澳洲首次上陣，就喺費明頓馬場角逐一千米表列賽，結果在岳禮華胯下後上擊敗對手，姿勢相當悅目，即使其後挑戰三級賽只跑第六名，但仍被視為一匹極有潛力嘅賽駒，之後被港方買家高價引入運港，難怪原本訓練此駒嘅練馬師余理萊都感到非常可惜，並相信此駒來港後可以闖一番功業。「時時好綵」係現任馬王「時時精綵」馬主王明澤名下，佢女兒王錦汶及兒子王經緯曾經將「進綵」及「好醒」交由方嘉柏訓練，並且合共取得六場頭馬，今次王氏與方仔再度合作，亦不令人意外，相信倉主會及早贏馬交代。