新冠肺炎疫情又再爆發，早前馬會轄下會所同高爾夫球場，先後發現有確診者到訪，用得會所設施都係會員或佢哋家屬，向來馬會會員都係尊貴身份象徵，但係病毒唔會理你尊唔尊貴，但馬會要為相關員工檢測同設施消毒，就大把手尾要跟。早前疫情放緩，賽馬日嘅入場限制已經稍為放寬。現在疫情反彈，馬會即刻封場，除咗少數馬主同工作人員，場內設施一律唔開放俾公眾，兩個馬場亦不設雙邊投注，情況又變返上半年接近閉門作賽嘅狀態。不過，有過大半年疫情下跑馬嘅經驗，無論疫情點反覆，照計賽事都會如期舉行。最近唔少人擔心，國際賽同騎師賽會受疫情影響，會否將兩項盛事押後。其實馬會都唔想將國際賽押後，主要原因係香港國際賽係世界巡迴賽嘅其中一站，若然唔能夠如期舉行，會影響成個系列賽事嘅計分排名。
疫情下國際交通大受影響，據聞馬會為確保國際賽得以順利舉行，不惜工本安排包機接載海外騎師、練馬師及相關職員到港，出戰十二月九日國際騎師錦標賽的六位海外騎師，馬會將派出兩架包機，配合嚴密的檢疫程序監控下，分別由英國及法國啟程。據消息透露，接載六位騎師的包機將會兵分兩路，莫雅、布宜學、馬昆與杜苑欣，四位將於倫敦希思路機場出發，而巴米高與布達德則會在法國巴黎啟程，預計兩班航機將於十二月七日同日抵港，六位騎師到埗後將會接受氣泡檢疫程序，直接抵達檢疫地方進行隔離。早前有關日本馬主查詢來港觀戰的可能性，香港賽馬會以本港疫情反覆為大前提，表明今屆國際賽將不會有海外馬主入場觀戰。
應屆英國冠軍騎師莫艾誠，於今年七月中旬在法國尚蒂伊馬場策騎後，呈交的尿液樣本含有可卡因殘渣，其後他委託獨立化驗所重新抽取樣本，以證清白。早前法國賽馬會競賽小組已對莫艾誠展開研訊，測試結果以及專家意見指莫艾誠的確未有服食可卡因，會方亦接納莫艾誠提交的證據及作供。莫艾誠指自己與可卡因服食者有親密行為，其後才知該人士有服用可卡因習慣，間接令自己體內含有可卡因殘渣，最後當地馬會判罰莫艾誠停賽3個月，由十二月十一日起計至明年三月十一日為止，騎者在此期間不能到第一部分賽馬地區策騎包括香港，但佢仍然可以趕及於杜拜世界盃賽期中上陣。莫艾誠隨後發出聲明，表示不會再對此結果上訴，他亦重申，自己從未吸食可卡因，感謝法國賽馬會給予他機會證明清白，並會藉着3個月停賽期，去反省自己今次事件的不足之處。