第六場､第三班､一六五○米。「必妙星」自從二月尾喺二班田草二千米以凌厲後勁殺敗「時時有餘」及「龍鼓飛揚」後，或許搏得太盡令到打後跑唔番水準，不過季內十月初跑田草千八，喜見與「勁搏」火併只負兩馬位跑第五，已見復甦八九，今次落到三班縮爭谷草一哩，提防施冷箭。
第七場､第三班､一○○○米。「樂滿家」七歲馬勝在級數夠高，重返三班作賽可望佔到優勢，翻看季初首仗跑三班同程，在潘頓胯下後上入Q，打後加分升回二班猶如坐馬監，今次減至七十八分再戰三班一千，今次搵周俊樂減七磅只孭一二五磅，又抽到一檔起步，集有利條件於一身，且看可否冷門闖關。
第八場､第三班､一二○○米。「人和家盛」季內跑過四仗，初出喺四班同程配潘頓熱門收韁取勝，翌仗升三班易配田泰安，排中檔早段力騎爭取有利位置，末段力弱只得第八；上仗配巴度排一檔，起步快閘守在好位，入直路力策下反應強勁殺入Q腳，埋門巴度再拍跳一課走來火力俱佳，誠屬馬膽之材。