■梁振英認為黎智英於這「嚴苛」保釋條件下仍有機會潛逃。 梁振英fb截圖被控「勾結外國或者境外勢力危害國家安全」罪及欺詐罪的壹傳媒創辦人黎智英獲批准保釋一事令全城譁然，攬炒派陣營嘅公民黨主席梁家傑就喺媒體話黎嘅保釋條件「苛刻」，聲言黎智英「插翼難飛」，但好多人都反駁佢，話日本曾有單情況類似嘅案件，保釋條件更加嚴格，但都畀人「着草」，加上黎智英唔單止有潛逃嘅動機，仲有潛逃能力，所以無論點睇，黎智英案嗰啲保釋條件，都係根本唔足以防止佢潛逃。
唔少人都不滿法庭畀黎智英保釋，更懷疑黎可能借機「走佬」，梁家傑早前接受無綫訪問時，唔知係咪想幫黎智英繼續獲得保釋「製造條件」，聲言黎無咗旅遊證件已經「無法從陸路走」，然後又提到之前「12逃犯」「着草」失敗，最終喺內地水域被捕一事，話黎智英今次真係「插翼難飛」咁話喎。
梁家傑呢番言論一出，即刻畀唔少人鬧爆。全國政協副主席梁振英忍唔住喺fb發帖貼出梁家傑嘅相關言論，並反問：「請問梁家傑，曾志健是怎樣走甩的？」
梁振英噚日繼續發帖話，「黎智英應否保釋，關鍵在於判斷黎智英會否潛逃。」佢強調，黎智英同佢嘅追隨者「對香港的司法公正沒有信心，更是害怕被送往中國內地審訊，黎在美國和台灣有強大的政治聯繫和極高的反華價值，同時他本人財力雄厚，這些都是不爭的事實，都是他潛逃的動機和能力。」
佢仲話，如果覺得法庭頒令嘅保釋條件足以防止黎智英潛逃，咁就要睇睇黎巴嫩裔汽車業大亨戈恩喺2018年，透過匿埋喺大型音箱入面逃離日本嘅例子。當時戈恩都係屢次被捕，而最近一次被捕，被東京法院繼續准許保釋，而當時嘅保釋條件十分嚴格，包括大約3,500萬港元保釋金、限制居住、禁止出境、護照交由律師保管、旅行超過3天必須獲法院許可、戈恩住所玄關必須設置監視錄影機、定期把錄製影像提供法院、只能使用律師提供不能上網的一部手機，通話記錄必須提交法院，及禁止與妻子接觸等。
過咗幾個月嘅一日傍晚，幾個大型音響設備箱喺關西機場被裝上私人飛機，起飛前往土耳其，戈恩就再冇喺日本露面。之後佢發表聲明，承認身處黎巴嫩，佢同妻子接受路透社訪問時仲話，係由一小組人喺短時間內迅速制定和執行計劃，「價錢合理」。
張國鈞：邊個話無證件就走唔到？
民建聯立法會議員張國鈞亦喺fb發帖文質疑，「邊個話無證件就走唔到？大把人走咗你唔講？」
唔少網民都覺得黎智英有好大風險潛逃。「Michael Wu」話：「佢自己開遊艇著（着）草去呆（台）灣都得喇！法官你（沒）收佢旅游（遊）證件有鬼用咩！」「周大寶」就曲直難分咁話：「佢同尾（美）國佬咁friend，咪叫尾（美）國派隊航母艦隊嚟接走咯（囉）！」「Kelvin Leung」亦話：「 走入美國領使（事）館唔使旅遊證件㗎！」
■香港文匯報記者 倪思言