●張國鈞就忍唔住喺fb出聲質問許智峯。 張國鈞fb截圖早前走佬去咗英國嘅立法會前議員許智峯，近日又走出嚟刷存在感，同大家繼續講自己啲信用卡俾銀行取消一事，仲聲言滙豐銀行有政治考慮同侵吞盈餘之嫌，要銀行公開交代事件，仲要求監管機構調查喎。
許智峯喺fb發文，話滙豐銀行以「商業決定」原因取消佢同家人嘅信用卡，仲列出3點「罪狀」指控滙豐銀行，要求佢地嚴正處理事件，否則會考慮其他國際上跟進行動。
唔找卡數俾銀行停卡本身都合情合理，更何況係一個走咗佬連法律責任都唔負、𠵱家身在何方嘅人，銀行梗係會出於各方面考量停你張卡啦。
張國鈞：信用唔係人人都有㗎
民建聯立法會議員張國鈞就忍唔住喺fb出聲質問許智峯：「你著（着）草畀（俾）人通輯，個人無信用仲攞乜嘢信用卡？其實符合國際標準，你估吓有冇美國銀行肯開信用卡畀（俾）斯諾登，仲唔取消就真係要調查啦！信用唔係人人都有㗎，將來唔還錢銀行追你又話政治迫害就唔好啦。」
網民都好認同張國鈞嘅意見，「Wesley Chan」就話：「自己有理，咪返嚟據理力爭，公開實情。自己有刑事在身，又唔面對法律責任，乜嘢都係政治迫害，定係有妄想症？我想（相）信獅子（滙豐）銀行，多過許生。」「Danny Chan」附和：「個人無信用又点（點）用信用卡呀，萬一簽完卡走左（咗）去，银（銀）行点（點）揾（搵）你呀！」「Bernan Hsui」亦話：「既然選擇流亡外國就應該有骨氣D（啲），斷絕一切跟香港所有關係，包括信用額度！」
有網民就更抵死咁講，其實許智峯三五七日就出嚟做show，真係懷疑佢所謂嘅「流亡」實質係一份工。但又咁講，如果許智峯真係咁緊張佢啲信用卡嘅話，佢都可以考慮親自返香港同銀行「據理力爭」喎。
■香港文匯報記者 倪思言