第一場、第五班、一二○○米。「表表馬」馬主係馬時亨同曾志偉兩老表，上季來港養在丁冠豪馬房，曾在四班谷草評四十三分跑第三名，今季落到五班依然無突破下加盟告東尼馬房，前仗轉廄後初出跑無根據嘅泥地，純粹熱一熱身，上次跑番谷賽一哩全程快放試馬味濃，今次同程有一哩唔報，刻意縮程四百米跑千二，用上田泰安壓陣話唔定放甩對手。
第三場、第四班、一二○○米。「變數」周歲價四萬六千澳元，在澳洲由衛德俠訓練於悉尼兩試大閘，首課九百米跟前開鞭下跑第二，第二課七百六十米沿途居後，直路上外欄衝上輕勝。其父「實際影響」是日本冠軍種馬「大震撼」子嗣，而母線血統亦相似，最佳路程由一千至千三米，估計「變數」性能亦以中短途較合，抵港操練工夫循序漸進日益成熟，今次隨時郁手。
第七場、第三班、一○○○米。「開心威龍」兩歲時喺澳洲六戰取得三場勝利，其中兩勝於霍達胯下取得，最後一戰兩歲一級賽阿堅斯錦標跑第三，估計買入價五百萬港元肯定冇走雞，但睇番前年六月周歲拍賣會，「開心威龍」成交價只係二千澳元，即係一萬港元左右，上手馬主執咗七十幾萬港元獎金，再以好價賣出，早熟馬在港試閘已見速度，初出外檔得第四名經已試準後勁，擺明三班唔蝕底，今次應可提升名次。