有消息傳蘇銘倫跑埋年初三就拜拜，因為佢寄望好高的「喜豐寶」在陣上跑跛了，四歲馬系列餘下兩關佢未必有好馬在手，逗留在港策騎冇乜着數，倒不如早返歐洲，聯絡各大倉主搵支持。當然消息還消息，未到最後一刻都難以印證。「喜豐寶」被急促拉停，蘇銘倫背部肌肉被扯一扯，即時要退下火線，好彩無大礙，休息足夠，影響不到今晚上陣，撇開去留問題，相信蘇銘倫現時只是一條心贏馬，搵水腳又好，希望搵更多支持又好，能夠成為佢想留低的變數亦不出奇。今次他胯下「王炸」、「噴火龍」及「加州明雋」均吹風有料到。
先講「王炸」所屬嘅方插A旗下「駿爵士」（圖前駒）、「冠鋒」、「日日靚」、「大醇威」、「精靈勇士」及「王炸」，在最後試跑朝均見方仔非常緊張，佢睇勻各駒的食料及體溫檢查報告，據知這些紀錄都是由方嘉柏兒子整理，因為乃父經已開始訓練愛兒，有朝一日可以接手。回說上述多匹方廄戰駒中，「駿爵士」跑千二米是倉主專登安排，因為現時跑一千米是嫌短，上賽陳嘉熙能把這駒跑入一席，倉主經已滿意。而「日日靚」上季是贏谷草一哩，不過，馬房今季集中火力攻谷草千二，可惜只能上名未能重啟勝門，今次倉主要向現實低頭，終於替這駒跑回一哩，莫雷拉再騎有信心贏馬。再講到初跑谷草一哩匹「王炸」，上場贏田草千四米，雖然過程唔見得輕鬆，蘇銘倫估計這駒跑長一點會更合性能，於是棄跑上周日由「勁力勇士」所贏的一場三班千四米，專登增程跑今次谷草一哩，信任騎練判斷的眼光，這匹「王炸」有本錢增程再捷，上述這三匹方廄戰駒，不妨看高一線。
蘇銘倫卜定噴火龍
一向與告東尼有交收的蘇銘倫，今次夜賽依然獲得「加州明雋」支持，據有關手足所透露，周一最後試跑，馬房安排「熱血鬥士」湯智傑與「幸福老撾」副練一對，另一對是「閃電精靈」外籍助手及「加州明雋」外籍助手，兩對馬在機坪拍踱完畢，下午又安排到泳池游水及照燈，之後返回馬房教閘，倉主在地堂監督，「加州明雋」近況越磨越靚，上場千四米臨場突然落到大熱門，有關人等輸到包頭，今次返回窄場一哩列陣，蘇銘倫獲重用，顯然有計。其餘三駒都是馬房邊線馬，QT作配無妨。
當然，告東尼馬房旗下「夢幻戰士」，只要神蘇出到聲，馬主一定會支持，不過今次神蘇一早推庄，原來佢一早應承霍利時嗰邊再替「噴火龍」效力。上場此駒在蘇銘倫胯下不敵「馬爾代夫」，僅僅輸條鼻毛，賽後再睇假如不是「馬爾代夫」執個靚內檔，俾潘頓慳慳埋埋贏馬，「噴火龍」必可砌低對手，因為衝線一刻最勁是「噴火龍」，今次馬房再替牠出戰一哩，難怪蘇銘倫一早卜定，再睇今次「噴火龍」排一個有利的四檔，應該可以補中。
沈集成緊張零距離
沈集成一對戰馬「零距離」及「勞動創造」，排位日倉主等埋釘甲匠到來換出賽用的銻甲，要親自檢查才放心，上述一對馬均是實力分子，有機會替馬房增添頭馬紀錄。