大機構工作文化通常都係少做少錯，唔做唔錯，做多咗未必會有獎，有乜差錯更隨時要孭鑊上身。練馬師霍利時（圖左前）早前谷草夜馬，因為排位朝遲了一分鐘入紙，結果悉數五匹正選馬退出，負責的副練當然要負上全責，而馬會方面依足規例指引，更在半小時前發出警告訊息送至練馬師霍利時馬房的電腦盡了責任。不過，當時屬於最後試跑課期，霍利時與副練可能出咗跑道及烽火台開工，加上位處於奧運馬房，看不到警告訊息絕不為奇，如果馬會賽事部有人肯行多一步，打電話講多聲提一提，情況未必會發生，以致原來出賽馬的馬主蒙上損失，而總數上少了數匹參戰馬，投注額亦可能受到影響。霍利時今次疏忽係鐵一般事實，但睇番成個賽後報告內容，情況係咪去到無可挽救，似乎又唔係，只要有關部門多行一步俾多少少溫馨提示，情況應該唔會去到遲咗一分鐘排唔到位嘅地步。規則係死，人係活的，練馬師雖然唔係馬會員工，但絕對係馬圈一分子及持分者，希望有關方面能夠汲取經驗，以免日後再有同類事件發生。
另一方面，本地馬迷唔使再擔心馬季歇暑期間無乜精神寄託，因為政府已經批准馬會今年增加十四個越洋轉播賽馬日，全年嘅越洋轉播賽馬日將會由本來嘅二十三日增加到三十七日，更重要嘅係一直以嚟每年七月中至八月底，個半月唔可以轉播賽事受注嘅限制都取消咗，馬會可以喺暑假轉播海外賽事並接受投注，一直以來爭論咗好多年嘅全年跑馬終於成為事實。其實上年因為疫情關係，政府已經開咗先例，俾咗馬會喺暑假期間轉播一次新加坡賽事，直到呢一刻完全解禁。現實啲講，增加越洋轉播賽對政府、馬會、馬迷同賽馬媒體各方面都有好處，算係一個多贏方案。若單純從觀賞賽馬運動嘅角度睇，暑假正值歐洲英法馬季舉行經典大賽嘅高峰期，例如著名英國古活賽期，以及於約克馬場舉行的伊波賽期，相信馬會屆時都會悉數將呢啲大賽轉播受注，普羅馬迷確係可以見識其他地方嘅賽馬文化擴闊眼界。若從投注人角度睇，當然亦唔會反對，暑假無本地馬有海外賽事填補空檔，啱心水者可以小注怡情動動腦筋。