● 相愛超過廿載，黃貫中和朱茵仍然恩愛非常。香港文匯報訊 適逢元宵佳節，恩愛夫妻黃貫中（Paul）和朱茵挑戰「愛情五秒定律」，除了互數對方身體「最大」之處，又無底線盡情放閃當眾獻吻；夫婦二人更借遊戲分享相處之道，寄語有情人時刻常存感恩、珍惜緣分。
日前黄氏夫婦接受「愛情五秒定律」測試，Paul被問到老婆激嬲自己的三個原因，隨即「機關槍式」搞笑謂：「天氣凍着唔夠衫、肚餓又唔食嘢、亂放雜物、唔願起身、遲到??咦，原來可以講到咁多。」令朱茵笑言要罰對方頂痰罐！他又笑指老婆身上三個最大的地方，就是「眼大、嘴大和志氣大」，氹得朱茵全程合不攏嘴。
談到老公婚前婚後的不同之處，朱茵便趁機投訴：「以前出街一定會拖實我，現在就會拖阿囡（黄鶯）；仲有以前唔會窒我，結婚後就係咁窒。」不過講到Paul具備的三個好老公條件，她就甜絲絲地表示：「大力、任我差遣，而且會煮飯畀我食。」一旁的Paul聞言即時反擊：「講緊好老公條件，唔係揀工人喎。」最終朱茵於賽事中落敗，並向Paul獻上香吻作為元宵禮物，羨煞全場！
老婆永遠是對的
相愛超過廿載，Paul和朱茵至今仍然恩愛非常，Paul不諱言經常有人向他取經：「好多人問我哋，一齊咁多年會唔會悶，講真話唔悶就呃你，但係要學習點樣避免呢種悶，最重要唔好有一個奉旨嘅心態，例如太太為你煮飯，你要識得欣賞，要覺得每一餐飯都係第一次，將呢個心態套用喺所有事情上，就唔會覺得悶，反而好新鮮。」朱茵也建議一眾有情人，為生活加添情趣，有助增進感情：「尤其𠵱家喺屋企嘅時間多咗，可以嘗試多啲唔同嘅嘢，最近我哋會等囡囡瞓覺後，一齊砌3D模型，都幾好玩㗎，同埋我哋晚晚都會睇戲。」
雖然因為育兒理念不同偶有爭執，但夫婦二人都會主動認錯，「愛妻號」Paul更自有一套「爭吵哲學」：「吵架輸咗，固然係輸；贏咗你都有排捱！既然輸贏都係處於輸家嘅狀態，奉勸各位男士最好就唔好同另一半嘈，係咪都認錯先。」