第三場、第五班、一二○○米。「翡翠」系新馬「翡翠鳳凰」今季跑六場次次入前四名，但尚未贏馬交代，至於同主「翡翠劇院」依然在默默耕耘，呢匹七歲馬上次賽後安排由文家良轉投姚本輝馬房，明顯馬主對呢匹老傢伙仲有點期望。講真「翡翠劇院」對上一次贏馬喺前季，當時評七十二分贏三班谷草千二米，如今減至三十八分降到五班，點計都有反彈能力，呢鋪易廄初出報戰三捷唯一勝途，有望做番齣好戲。
第五場、第四班、一六五○米。「紫菜福星」今季初出千四米爆冷贏馬，跑第二的「保羅承傳」之後經已取得四捷，身後「海島材子」、「會展達人」、「冠寶駒」及「夢幻戰士」全部贏馬，可見賽事水準甚高。翻查血統，本身與「狂舞派」和「緻寶駒」同父，血緣擅跑谷草中長途，上次初次渡江已跑近，再來有力介入戰團。
第八場、第三班、一二○○米。馬主至高賽馬團體過往養過四駒，成績最好一駒係當年由希斯訓練、贏過八場嘅「高耀之星」，今季希斯回流，此團體冇將現役嗰匹「高耀智星」轉嚟支持，相信係睇在苗禮德交到貨。「高耀智星」上季跑五場獲兩冠三亞軍一百巴仙入Q，雖然今季八戰全敗，但連續兩場谷草千二米有番追勢，七日前飛出三疊望空走，結果只輸兩個馬位，今次匆匆再來兼係馬房的第一志願馬，應該係時候反彈。