今晚快活谷跑九場賽事，以C欄C加三彎跑道作賽，頭場下午六時四十五分開跑，全晚並無設立錦標賽場合。練馬師方面，方嘉柏、沈集成及羅富全均派出多匹惡馬參戰，值得優先留意。騎師方面，雷神、田泰安及潘頓都手執多匹實力坐騎，可作為扶手棍看待，冷門可向賀銘年埋手。
第一場、第三班、二二○○米。「曈曨光彩」天賦慢熱，上季尾跑同程中段發力，最終後上取得突破；踏入今季評八十二分於二班起步，先後六戰均所負不遠，上仗落班縮爭谷草千八，配馬雅後追入位加速力較慢，今次操足轉戰二千二係贏馬最佳機會，值得優先捧場。
第二場、第五班、一二○○米。「全中」翻看季內第二仗跑泥地千二，早段自製超快步速亦只負三又四分一馬位；再看牠跑谷草短途也不差，大前仗出爭谷草千二，起步快閘守在第三位，最後力策下跑回一席第四。今次在五班再戰此程，如交得出早前喺四班跑第四時水準，絕對有拚勝分量。
第三場、第五班、一二○○米。「翡翠劇院」自一八年十月後再無贏馬，而服役以來三捷俱取自谷草千二，可見路有專長，今次再戰此程，計馬久未取勝，但於今季初曾在同程入位，證明戰鬥力猶在，而近期在晨課出試所見，馬兒走勢仍甚理想，正具備良好狀態，今仗只要交出應有水準，已有足夠條件勝回一場。
第四場、第四班、一六五○米。「好友無敵」季內戰至一月中跑田草千二初見追勢，前半段大部分時間居三、四疊，直路初仍見有好走勢，最後輸得近，頭二馬「觀世界」及「明欣賞」再出無W有Q，賽事水準不俗；打後三戰，前仗於谷草一哩後上爆出冷W，榮仔留放亦見工夫；上次負輕磅排大外檔仍可殺入大冷位，現時狀態正銳只孭輕磅出拚，仍有冷敲價值。
第五場、第四班、一六五○米。「皇寶」父系「皇僕」屬中距離分子，不少同父馬於谷草中距離跑得好；「皇寶」前仗出爭谷草一哩，轉彎位曾阻及對手跑線，最後仍保住Q腳；上仗易配雷神，兩倍大熱門放頭走，末段保持走勢跑回第四，今次練者報谷草一哩乃合理部署，班利分子可再追一趟。
第六場、第四班、一二○○米。「紅鬃烈馬」（圖前駒）上季乃晨操之星，操好賽劣，相隔一個暑期，今季果然有好表現，首三戰全上名，第三仗入Q僅不敵「勝得威風」；前仗斷纜或許跟得急，亦可能因體重急跌體力下滑；剛仗換上雷神轉戰窄場千二熱門開齋，拚後喜見馬身更飽滿，有力再傳捷報。
第七場、第四班、一○○○米。「你知我勝」今季於谷草一千打開勝門，四檔起步早段守貼欄第三位，末段發力輕易彈甩「旅遊拿督」個多馬位；前仗再出只得第六，排大外檔早段耗力搶前，二疊無遮擋跟前領馬跑，純輸形勢；上次排十檔，惟騎者搶閘切入前領守好位，最後力拚險勝，今次仍留四班，值得繼續捧場。
第八場、第三班、一二○○米。「資本家」季內初出跑谷草千二票數已甚硬朗，卻因首度出賽，途中不願在其他馬匹內側競跑，以至跑來不大暢順，但仍後上追入平頭的亞席；翌仗一氣帶返開糊，剛仗雷神放出卻未能埋尾只跑第四，今賽可望勝出第二W。
第九場、第三班、一二○○米。「零距離」沈廄三歲D布早熟快馬，季內跑了四仗，第三仗初配潘頓爭谷草千二，以後勁擊敗「峰爭」及「中華威威」打開勝門；上仗唞咗個多月再出，再以輕鬆姿態贏「箭意」添食，今次升班再戰勝途，環看對手實力非強，可望爭取三連捷。