● 2018年3月下旬，周竪峰出席在台北舉行的「五獨論壇」宣揚「港獨」主張而被主持人讚賞。 資料圖片網民斥無恥圖私利 張國鈞：又話核爆都唔割？
犯法唔只會失義，仲要承擔刑責。不過，唔少聲大夾惡煽人衝嘅「獨人」都冇咁嘅承擔，仲相繼畏罪着草。好似承認自己係懦夫嘅中文大學學生會前會長周竪峰，噚日就喺facebook宣布自己已經着咗草去咗加拿大，仲同「手足」講：「希望大家原諒我的『懦弱』。」唔少網民都留言話：「大難臨頭各自飛。」●香港文匯報記者 黃書蘭
周竪峰多年嚟做嘅衰嘢一籮籮。好似2017年佢就喺中文大學以暴力對待移除校內「港獨」海報嘅內地生，辱罵內地生為「支那人」，又公然喺校園播「獨」，俾校方警誡；2019年參與破壞立法會事件，事後着草日本兩周後返回香港；2020年同班攬炒派區議員籌備成立非法「公民議政平台」，擔任「平台」籌委會秘書，但因「平台」內部出現嚴重分歧，未成立已宣布解散；上月15號更同攬炒派區議員李志宏和黃學禮等28人一齊違反「限聚令」，喺灣仔一間餐廳內擺結婚酒俾警方當場票控。
陳克勤：大巴咁摑小黃人
周竪峰噚日就喺fb話自己喺上個月結婚後10日已離港着草：「很對不起各位兄弟，對不起各位手足，希望大家原諒我的『懦弱』。」佢仲稱曾有內地背景的人想透過中間人約佢傾非法「公民議政平台」嘅事，而佢雖然冇赴會，但就擔心自己若唔「篤灰」，就有機會成為下個被捕入獄嘅人。不過，網民「Chan KMan」就咁回應：「作呢啲藉口，係想分散人哋注意力啫，中間人哦。你以為你乜水呀？」
對於周竪峰選擇做逃兵，唔少網民就鬧佢「背信棄義」。好似民建聯立法會議員陳克勤喺fb發帖話：「周竪峰嘅一句：『對唔住手足』同埋『希望大家原諒我的懦弱』真係大巴大巴咁刮（摑）落啲小黃人度。」民建聯另一立法會議員張國鈞亦喺facebook發文，笑周竪峰「着草走佬保平安」，仲 hashtag 提提一眾「手足」「勇武本土又敗走」「又話核爆都唔割」。
又話齊上齊落 食言如食生菜
網民「Hazel Chan」就話：「當日大大聲講『齊上齊落』，到咗面對刑罰，就走得快好世界。」「Johnson Tsay」都話：「食言同食生菜一樣。」「韓警概」都揶揄話：「『革命』只是口號。」
有網民就指做衰嘢嗰陣又唔見佢「懦弱」。「Wendy Chan」話：「『懦弱』？講粗口時好兇狠！」「Wai Shing Chan」就話：「當年鬧國內大學生鬧得咁勁，而（𠵱）家變成烏龜......」「Cecilia Wong」都話：「不是『懦弱』，係無恥，只圖私利！」
唔少網民都話反映香港國安法震懾「獨人」。「白震」話：「全靠國家幫香港立了國安法。」「Ming Lam」就話：「黑暴敗走，對香港嘅市人（民），對香港嘅經濟，對香港嘅法治絕對係好事。」「Jenny Li」都話：「走慢啲都要坐。」
「Lauren Chan」就話反映「獨人」經已冇市場：「這人反中亂港，欺負中國學生，狂妄自大，粗言穢語，在香港沒有公司聘請。找不到工作，如果不離開，等餓死咩！」