●「台灣羅東肉?番（香港）」近日被員工穿櫃桶底，店主嘆「家賊難防」。instagram截圖日防夜防，黃圈啲賊最難防。唔知係咪近日唔少黃店都傳出被「手足」穿櫃桶底，但又唔敢報警嘅笑話，搞到愈嚟愈多手腳唔乾淨嘅「手足」都知道偷嘢冇後果，所以愈嚟愈多黃店都發生穿櫃桶底事件，今次嘅主角就係「台灣羅東肉?番（香港）」嘞。話說呢間黃店嘅店主噚日喺facebook「開名」揭發一名前同事偷咗店舖嘅錢，但佢就按照黃店一貫做法玩「私了」，即係唔報警但又要求個賊喺限期前交返啲錢出嚟。結果？梗係睬你都傻啦！
「台灣羅東肉?番（香港）」前日喺fb貼文話：「日防夜防，家賊難防。」「經營已經咁艱難，真的是血汗錢！公司有曬（晒）cctv（閉路電視），點解要摧毀自己前途？前廚房同事（邱梓寒）限你今日18:00前將5月9號（日）偷取嘅錢歸還。」
唔少黃絲網民見到呢啲似曾相識嘅對白都十分慨嘆，好似「Chan Ho Lam」就話：「唉，點解宜（??）家呢d（啲）情況愈嚟愈密，大家有咩事唔可以商量吓嗎？」「Noodle Lee」就叫店主果斷啲：「唔好諗，報警，過多幾日就會話你爭佢糧。」「黃小明」就福爾摩斯上身：「俾（畀）機會D（啲）人無（冇）用，應該係慣犯，劇情應該會變成：『通融多幾日得唔得』，有拖無欠啦！」
網民預言劇情開口中
唔知係「黃小明」嘅預言真係咁準，定黃圈啲人都係同一個格，「台灣羅東肉?番（香港）」嘅店主夜晚就再喺fb發帖，大呻「人生好累」「大家估得好啱，都係：『可唔可以通融幾日』限期為5月13號時間18:00，歸還2.2萬元正，得20（廿）幾歲仔，前途在自己手，好自為之。」
原名葉鍵濠的商台節目主持健吾轉發咗呢啲帖文，並配文道：「又一間黃店出現家賊。」社民連前副秘書長、輔仁媒體主編容樂其就同大家玩設問：「報唔報警好？但一報警就變藍店。」「Jelly Tai」就回應話：「千祈唔好報警，報警即係向『極權』低頭。」
「甘道夫」就揶揄：「YC（黃絲）的精神是尊重和包容。」「Nanakase Au」亦話：「江湖救急吖，唔係唔救呀，急到賴（瀨）呀！」「Kathy Ng」就笑言：「可能偷緊第二個錢還俾（畀）你！」
黃店被穿櫃桶底嘅情況真係愈嚟愈密，就好似另一黃店「潮食閣」早前被員工偷咗價值幾千蚊嘅貨品後，近幾日又俾另一批員工偷咗4月份共7萬蚊嘅營業額，搞到冇錢交租又冇錢出糧，但「潮食閣」又係選擇唔報警，諗住彰顯「大愛包容」嘅精神，私下了事，結果仲俾偷錢疑犯去勞工處投訴欠薪。咁搞法，睇嚟黃店穿櫃桶底嘅浪潮應該一浪接一浪嘞。 ●香港文匯報記者 雨航